भांगरभूंय | प्रतिनिधी
ल्हान कामां खातीर आनीक एका सप्तकाचो काळ लागुयेः संजीत रॉड्रिग्ज
पणजी: स्मार्ट सिटी खाला सुरू आशिल्ल्या कामांनी खूबशीं आव्हानां आसात. अशें आसलें तरी चडशीं कामां 31 मे मेरेन पुराय जातलीं. पूण कांय ल्हान कामां पुराय जावपा खातीर 31 मे उपरांत एका सप्तकाचो काळ लागूंक शकता अशी म्हायती स्मार्ट सिटीचे मुख्य कार्यकारी अधिकारी संजीत रॉड्रिग्ज हांणी दिली.
बिरेस्तारा स्मार्ट सिटी कामां विशीं नियाळ बसका घेतली. ह्या वेळार भौशीक बांदकाम खात्याच्या अधिकाऱ्यां सयत कंत्राटदार हाजीर आशिल्ले.
संजीत रॉड्रिग्ज हांणी म्हणलें, आमी 31 मे मेरेन चडशे रस्ते सुरू करपाचो यत्न करतात. हे रस्ते काँक्रिटाचे आशिल्ल्यान कांय कडेन क्युअरींग म्हणल्यार रस्तो बांदून जाले उपरांत तो येरादारी खातीर योग्य जावपा खातीर थोडो वेळ लागूंक शकता.
आयचे बसकेंत कंत्राटदारांक कामाच्या निमाणें मुजती विशीं परतून एकदां कल्पना दिल्या. जतनाय घेवन कामाची गती वाडोवपाच्यो सुचोवण्यो लेगीत केल्यात. सद्या कंत्राटदार दीस रात काम करीत आसात. ताका लागून तांचेर लेगीत अालायतो ताण दिवप योग्य न्हय अशें रॉड्रिग्ज हांणी म्हणलें.
मुखार उलयतना तांणी म्हणलें, स्मार्ट सिटीच्या कामांत खूबशीं आडमेळीं आयल्यांत. कांय दिसां पयलीं पणजेंत पडिल्लो पावस, कामगार दिसाची सुटी, वेंचणूक, मतदाना खातीर आपल्या गांवघरा गेल्ले कामगार अशा विवीध कारणांनी स्मार्ट सिटीचीं कामां कांसवा गतीन सुरू आशिल्लीं. अशें आसलें तरी आमी कांम थांबयलें ना. पणजेंत जाल्ल्या पावसा वेळार स्मार्ट सिटीच्या ड्रेनेजाचीं कामां पुराय जावंक नाशिल्लीं. ताका लागून कांय सुवातांनी उदक सांचून उरिल्लें. हवामान खात्यान 11 ते 13 मजगतीं, पावसाची शक्यताय उक्तायल्या. हाका लागून लेगीत कामांक कळाव जावंक शकता.
रायबंदर ते पोरणें गोंय रस्तो 31 मे करतले पुराय
सद्या रायबंदर ते चिंबल रस्त्यार काम सुरू आसा. थंय उदकाची पातळी चड आशिल्ल्यान घाण उदकाची वाहिनी घालपा खातीर कांय आव्हानां आसात. अशें आसलें तरी 31 मे मेरेन रायबंदर ते पोरणें गोंय ह्या रस्त्याचें काम पुराय करून तो उक्तो करतले अशें संजीत रॉड्रिग्स हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
