भांगरभूंय | प्रतिनिधी
पणजी: शारांतल्या नागरिकांक धाडशी खेळ, भलायकेन भरिल्ली जिणेशैली आनी मनरिजवणेच्यो संदी उपलब्ध करून दिवपाच्या हेतान ’पणजी स्मार्ट सिटी डेव्हलपमेंट लिमिटेड’ वतीन ’स्मार्ट सिटी क्लायम्बींग वॉल’ सुरू केल्या. गोंयचें क्लायंम्बींग आनी आवटडोर धाडशी खेळां मदली अग्रणी संस्था ’डव्हेंचर ब्रेक्स’ हांच्या सहकार्यान ही अत्याधुनीक सुविधा विकसीत केल्या.
ही सुविधा सगळ्या पिरायेच्या आनी कुशळटाय पातळेच्या नागरिकांक उपलब्ध आसा. तशेंच ही सुविधा सुरक्षीत वातावरणांत चडपाचो अणभव घेवपाची संद दितली. ही सुविधा नव्याच शिकपी पसून ते अणभव आशिल्ल्या क्लायंबर्स मेरेन सगळ्यांची शारिरीक आनी मानसीक क्षमता वाडोवपा खातीर उपेगी थारतली.
हे विशीं आयपीएससीडीएलचे मुखेल महावेवस्थापक एदुआर्द जे. परेरा हांणी, स्मार्ट सिटी क्लायम्बींग वॉलाक लागून आयपीएससीडीएलच्या भौशीक सुविधांनी आनीक एका आधुनीक खेळां सुविधेची भर पडल्या. थळावे नागरीक आनी पर्यटकांक क्लायम्बींग, मनरिजवण आनी शरिरीक हालचालीं खातीर दर्जेदार सुवात उपलब्ध करून दिवपाच्या हेतान ही सुविधा उबारल्या. हाका लागून क्लायम्बींग ह्या खेळा विशीं जागरुकताय वाडून चडांत चड लोकांचो हातूंत आसपाव वाडटलो, अशी अपेक्षा आसा. विवीध मनरिजवणेच्या आनी समुदायाभिमुख उपक्रमां खातीर भौशीक सुवातांची उदरगत करपा खातीर आयपीएससीडीएल सैगीत यत्न करतले.
अत्याधुनीक क्लायम्बींग सुविधा, आंतरराष्ट्रीय मानकां प्रमाण सुरक्षा वेवस्था आनी प्रशिक्षीत प्रशिक्षकांच्या मार्गदर्शनाक लागून गोंयच्या नागरिकां खातीर क्लायम्बींगचे खेळ आनीक सुरळीत जातले. मनरिजवण, फिटनेस आनी कुशळ उदरगती खातीर ही सुविधा एक प्रभावी माची थारतली, हाचे वरवीं वाटेकार जावप्यांची धाडसी वृत्ती चालीक लागतली.
क्लायम्बींग हो संवसारभर वेगान लोकप्रिय जावपी खेळ. ताका ऑलिम्पीक खेळां प्रकाराचो दर्जोय मेळ्ळो. ह्या खेळाक लागून शरिरीक तांक, लवचिकताय, संतुलन, हालचालींची तांक, एकाग्रता, आत्मविस्वास आनी समस्या सोडोवपाची तांक विकसीत जावपाक मजत जाता.
हे सुविधेचे कार्यान्वयन भागीदार आशिल्ल्या एडव्हेंचर ब्रेक्सान फाटल्या १२ वर्सां परच चड काळ गोंयांत क्लायंबिंगचो प्रसार करपा खातीर म्हत्वाचें योगदान दिलां. संस्थेवतीन राज्यभरच्यो शाळा आनी विवीध सुवातांचेर नेमान क्लायम्बींग उपक्रम राबयिल्ल्यान, हजारांनी तरणाट्यांक ह्या खेळाची वळख करून दिल्या.
सुरवातेच्या टप्प्यांत ’स्मार्ट सिटी क्लायम्बींग वॉल’ दर शुक्रार, शेनवार आनी आयतारा सांजेवेळार ६ ते रातच्या ९ ह्या वेळार नागरिकां खातीर उक्तें आसतलें. तशेंच पयलींच केल्ले नोंदणी वरवीं विद्यार्थी गट, शिक्षणीक संस्था, कॉर्पोरेट टीम-बिल्डींग उपक्रम आनी वाडदीस समारंभां खातीरूय ही सुविधा उपलब्ध करून दितले.
ह्या उपक्रमाक लागून ’पणजी स्मार्ट सिटी’च्या आधुनीक आनी नागरिकांभिमूख शारी पांयाभूत सुविधा विकसीत करपाच्या उद्दिश्टाक आनीक बळगें मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
