भांगरभूंय | प्रतिनिधी
पणजीः स्मार्ट सिटीच्या फोंडकुलांनी पडून भुरग्यांक मरण आयिल्ल्या प्रकरणाचेर चवकशी करपाक पुलिसांक निर्देश दिवपा खातीरची याचिका गोंय तृणमूल काँग्रेसीन पणजे पयलो वर्ग न्यायालयांत दाखल केल्या. न्यायालयान पणजे पुलिसांक हे विशींची एफआयआर नोंद करून स्मार्ट सिटीचे अधिकारी आनी कंत्राटदारा आड गुन्यांव नोंद करपाची मागणी तृणमूल काँग्रेसीन केल्या.
तृणमूल काँग्रेसीचे राष्ट्रीय म्हणयारे ट्रॉजन डिमेलो आनी जोड समन्वयक समील वळवयकार हांणी आपले अॅड. दर्शन गोसावी सयत आल्तीन पणजे पयलो वर्ग न्यायालयांत पणजी पुलिसां आड याचिका दाखल केली. नव्या वर्साचे रातीं पणजेचो आदलो नगरसेवक रुपेश हळर्णकाराचो पूत आयूष हळर्णकार आपली मोटारसायकल चलयतना पणजे खणिल्ल्या स्मार्ट सिटीच्या फोंडकुलांत पडून ताका मरण आयिल्लें.
हे घडणुकेक स्मार्ट सिटी आनी पणजी म्हानगरपालिका जापसालदार आसा, पूण अजूनय त्या भुरग्याक आनी ताच्या कुटुंबाक न्याय मेळूंक ना. जानेवारीचे 5 वेर आमी पणजी पुलीस स्टेशनार स्मार्ट सिटी आनी म्हानगरपालिके आड कागाळ दाखल केल्ली. पूण पणजी पुलिसांनी ताची दखल घेवंक नाशिल्ल्यान आमी उत्तर गोंय पुलीस अधिक्षकांची भेट घेतली. पूण तांणीय कानामनार घेवंक ना. देखून आमकां न्यायालयांत वच्चें पडलां अशें ट्रॉजन डिमेलो हांणी सांगलें.
भुरगो मरण पावले उपरांत कांय दिसांनीच सरकारान हो विशय बंद केलो. खरे म्हणल्यार स्मार्ट सिटीचे सीईओन कंत्राटदारा आड कागाळ नोंद करपाक जाय आशिल्ली. पूण सगलीं सेटिंगां जाल्यांत. देखून आमची कागाळ नोंद करून मरण पाविल्ल्या भुरग्याक आनी ताच्या कुटुंबाक न्याय दिवपाची मागणी न्यायालया कडेन केल्या अशे समील वळवयकार हांणी सांगलें.
स्मार्ट सिटीच्या अधिकाऱ्यां कडल्यान गुन्यांवकारी घडणुकेचेर आडनदर जावन उरलां. 15 फेब्रुवारीक आमी पुलीस अधिक्षका कडेन कागाळ नोंदयिल्ली. देखून अजून मेरेन कसलीच दखल घेवंक ना. देखून कंत्राटदार, म्हानगरपालिकेचे आयुक्त आनी म्हापौरा आड गुन्यांव नोंद करपाचे निर्देश न्यायालयान दिवचे अशी मागणी आमी याचिकेंत केल्या, अशे अॅड. दर्शन गोसावी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
