भांगरभूंय | प्रतिनिधी
भितरले रस्ते फोडिल्ल्यान मुखेल रस्त्याचेर पेंच; गाडयांच्यो रांको
भांगरभूंय । प्रतिनिधी
पणजीः पणजेचे भितरले चडशे सगळेच रस्ते खणीन दवरिल्ल्यान भायल्या मुखेल रस्त्यांचेर सामकोच पेंच आयला. येरादारीची कोंयडी जावन गाडयांच्यो लांबचे लांब रांको लागतात. ह्या सगळ्या प्रकाराक लागून पणजेकारांचें पाशियेंस सामकेंच पेड्डेर जालां. स्मार्ट सिटीचें गिराण केन्ना तरी सोंपतलें आनी थाकाय मेळटली, अशें पणजेकारांक जालां.
पणजी शारांतले भितरले रस्ते घाणयाऱ्या उदकाची पायपलायन घालचे खातीर तशेंच काँक्रिटाचे रस्ते करपा खातीर खणल्यात. ताका लागून ह्या रस्त्यां वयली येरादारी पुराय बंद आसा. हे खातीर भायल्या मुखेल रस्त्यांचेर येरादारी वाडल्या आनी गाडयांची कोंयडी जाता.
पणजेच्या दयानंद बांदोडकार रस्त्याचेर आनी पणजी तशेंच ताळगांवाक जोडपी भाटल्यांतल्या रस्त्यांचेर लोकांक शारांत येवपाक निंबून रावचें पडटा. पूण ह्या रस्त्याचेर पुराय शारांतल्या गाडयांचो पेंच येवपाक लागिल्ल्यान थंय वराचीं वरां गाडयो आडकून उरतात. पणजेकारांचो चडसो मोलादीक वेळ हे कोंयडेंत वगडावचो पडटा.
सांतिनेज मधुबन जंक्सन, शितल जंक्शन, पणजी मार्केट ते डॉन बॉस्को रस्तो तशेंच विवांता जंक्शनाचेर रस्तो खणपाचें काम चालू आसा. ताका लागून ते येरादारी खातीर बंद केल्यात. तशेंच महालक्ष्मी देवळा कुशीचोय रस्तो खणला. हेर ल्हान रस्त्यांचेर घाणयाऱ्या उदकाची पायपलायन घालपाचें काम चालू आसा. हे खातीर लोक शारांत येवपाक दयानंद बांदोडकार ह्या मुखेल रस्त्याचो वापर करतात. पूण सांतिनेज वाठारांतलीं दोन टोका जोडपी रस्तो बंद आशिल्ल्यान कला अकादमी ते बाल भवन रस्त्यार गाडयांची सुमारा भायर गर्दी पळोवपाक मेळटा. कोणाची शाळा चुकता जाल्यार कोणाक कामार पावपाक उशीर जाता. ह्या सगळे धावपळीक लागून पणजेकारांक पिशे लागपाचो वेळ आयला.
पणजी शार फुडारांत चकचकीत दिसपा खातीर खूबश्या विभागांनी कामाक नेट लायला. हो म्हयनो सोंपता म्हणसर स्मार्ट सिटीचीं कामां पुराय जातलीं, अशें सरकार सांगता खरें, पूण कामांक लागून लोकांक सतावपी समस्येचेर सरकारान विशेश लक्ष दिवपाची गरज आसा. आल्तीन, पणजी बसस्टॅण्ड, कांपालार गाडयांचो रांको लागतात. ते भायर भितरले रस्ते खणून बंद केल्ल्यान लोकांचे वेवसाय बुडल्यात, अशी कागाळ वेवसायीक उदय शिरोडकार हांणी केल्या. पणजेकारांसक जावपी हे त्रास बेगीन पयस करचे, अशीय तांणी मागणी केल्या.
बादोडकार मार्गा वयली येरादारेची कोंयडी चुकोवपा खातीर लोक भाटल्यांतलो रस्तो वापरपाक लागले, पूण थंय लेगीत तीच परिस्थिती. बांदोडकार रस्त्या वरी भाटल्यांतलो रस्तो लेगीत ब्लॉक जाता. भाटल्यांतलो रस्तो आदींच अशीर. थंय येरादारी वाडिल्ल्यान गाडयांच्यो वरांचीं वरां रांको लागतात. ते भायर ह्या रस्त्याची आदींच आवतिकाय जाल्या आनी दुश्काळांत तेरावो म्हयनो म्हणल्यार गाडयांची कोंयडी.
खूब तेंप जालो लोकांचे हाल चालूच आसात. स्मार्ट सिटीचें काम सुरू जावचे पयलींय भाटल्यांतल्या रस्त्याची आवतिकाय जाल्ली. रस्त्याक नवें करकरीत घातिल्लें डांबर पयल्याच पावसान व्हांवून गेलें. स्मार्ट सिटीच्या कामाक लागून पुराय रस्तो ब्लॉक जाता. दोनूय वटांतल्यान गाडयो सुटनात. तशेंच बशीं खातीर लोकांचे हाल जाल्यार विचारुकूंच नाका, अशें समाज वावुरपी सेसील रॉड्रिग्स हांणी सांगलें.
चालू आशिल्ल्या कामांची कसलीच गॅरंटी नाः सेसील
मोन्सेरात फॅमिली राज्यांत फाटलीं कितलीशींच वर्सां जालीं, कसलेंच नियोजन ना. तात्पुरतीं कामां करून दवरतात आनी ताचो परिणाम लोकांक भोगचो पडटा. सध्या चालू आशिल्ल्या कामांची लेगीत कसलीच गॅरंटी ना, अशें सेसील रॉड्रिग्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
