भांगरभूंय | प्रतिनिधी
वाठारांत पातळ्ळें घाणीचें साम्राज्य; थळावे नाक बंद करून काडटात दीस
पणजीः स्मार्ट सिटीच्या कामाचें घाळपण परतून एक फावटी उक्तडार आयलां. पणजे महालक्ष्मी देवळा लागसार चर मारतना स्मार्ट सिटीन पोरणें सिवरेजीचें पायप फोडिल्ल्यान सिवरेजीचें उदक तातूंतल्यान व्हांवत आसा. स्मार्ट सिटीन तें पायप तशेंच सोडून दिल्ल्यान चरीत घाणयाऱ्या उदकाचें कोंड तयार जावन उरलां.
पणजे दादा वैद्य रस्त्यार मशिदीचे मात्शे मुखा वेल्या रस्त्या मदीं चर मारपाचे काम स्मार्ट सिटीच्या कंत्राटदारान हातांत घेतलां. पूण नियोजन नासतना हें काम हातांत घेतिल्ल्या कारणान कंत्राटदारान आदले सिवरेजीचें पायप फोडलां. फाटले तीन दीस जाले फोडिल्लें पायप तशेंच दवरलां. पायपांतल्यान घाण उदकाचो झरो व्हांवता. जेन्ना सिवरेज प्रकल्पांत पंपींग चालू जाता तेन्ना ह्या पायपांतल्यान घसोघसो तयार जावन चरी भितर घाणयाऱ्या उदकाचे कोंड तयार जाता.
हे घडणुकेक लागून लागसारच्या वाठारांत घाणीचें साम्राज्य पातळ्ळां. थळावे आनी दुकानदार नाक बंद करून दीस काडटात. ह्या वाठारांत दुयेंसां पातळपाची भिरांत तयार जाल्या. रस्त्या मदीं दोन फूट खोल खणिल्ले चरीक लागून लोकांक रस्तो हुपतना त्रास जाता. लोक सर्कस करून रस्तो हुपतात. पूण
कंत्राटदारान हें फुटिल्लें सिवरेजीचें पायप तशेंच दवरून दुरुस्त करिनासतना डेडलायनी भितर आडबडींत काम करप चालूच दवरलां.
हे विशीं आदले पणजेचे म्हापौर उदय मडकयकार हांकां हे विशीं विचारलें तेन्ना तांणी सांगलें की, सिवरेजेचीं पायपां फोडून घाण उदक रस्त्यार सोडपाचो प्रकार पणजेच्या सगल्या वाठारांनी चालू आसा. जेन्ना रस्ते फोडपाचे काम करतात थंयसर भौशीक बांदकाम खात्याचे पंगड, वीज खात्याचे पंगड आनी हेर खात्याचे पंगड आसूंक जाय. कामाचेर तांणी देखरेख दवरपाक जाय आनी कसलोय प्रस्न उप्रासलो जाल्यार तो सुटावो करपाक तांणी पावला मारूंक जाय. पूण पणजेंत हें खंयच दिसून येना, अशे मडयकार हांणी सांगलें.
देखरेख नाशिल्ल्या कारणान भाटल्यां स वरां लायट गेल्ली. उदकाची पायपलायन फोडून लोकांचे हाल केल्यात. उंचेल्या पांवड्या वेले अधिकारी खंयच दिसनात. फक्त ग्रावंड पांवड्या वेले कर्माचारी सगलीं कामां करतात. दोन-तीन दिसां भितर पावस सुरू जावपाचो आसा आनी 31 मे मेरेन हीं कामां कशींच पुराय जावंक शकनात. काकुलो मॉल ते टोंक रस्तो 10 जून मेरेन बंद दवरून हीं कामां 31 मे मेरन पुराय जायनात अशी अप्रत्यक्ष जाप स्मार्ट सिटीन दिल्या असो आरोप मडकयकार हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
