भांगरभूंय | प्रतिनिधी
कंत्राटदराक घालात काळे वळेरेंत
विरोधी आनी आदल्या नगरसेवकांची मागणी
पणजीः सांतीनेज ताड माड देवळाची धड कोसळिल्ल्यान विरोधी नगरसेवकांनी आनी आदल्या नगरसेवकांनी स्मार्ट सिटीच्या बाबत दर्जाच्या कामा विशीं तिडक उक्तायली. इतले कोटी खर्च करून लेगीत जर हें काम स म्हयने तिगून उरना जाल्यार हातूंत गुड्डलुसांव आसा असो दुबाव येता. तशेंच हें काम करपी कंत्राटदाराक काळे वळेरेंत घालपाची मागणी तांणी केल्या.
सोमारा सकाळीं पावसाक लागून सांतीनेज रस्त्यार ताड माड देवस्थानाची धड कोसळिल्ली, आनी नव्यान बांदिल्लें गटारूय कोसळिल्लें. गटारा पोंदची माती पावसाच्या उदकाक लागून मोव जाल्ल्यान वजनान ही धड कोसळ्ळी.
काकुलो मोल ते टोंक मेरेनचो रस्तो स्मार्ट सिटीच्या कामाक लागून बंद दवरला, आनी 21 मे मेरेन तें काम पुराय करपाची डेडलायन स्मार्ट सिटी मुखार दवरिल्ली. ह्या रस्त्याचें काम सुरू जावन खूब तेंप जालो आनी धड कोसळपाची घडणूक घडले उपरांत हाका वेगळेंच मोडण मेळ्ळें.
हे घडणुकेचेर उलयतना पणजीचे आदले म्हापौर तशेंच नगरसेवक उदय मडकयकार हांणी स्मार्ट सिटीच्या कामाच्या दर्जाचें आनी खर्चाचें ऑडीट करपाची मागणी सरकारा कडेन लावन धरल्या.
स्मार्ट सिटीच्या कामाचो दर्जो सामकोच बाबत आसा अशे हांव म्हणत आयिल्लों, आनी ताड माड वाठारांत जाल्ले घडणुके वेल्यान तें परतून सिध्द जालां. देखून सरकारान ह्या कामाच्या दर्जाचें आनी खर्चाचें ऑडीट करपाची गरज आसा, अशें मडकयकार हांणी म्हणलें.
25 वर्सा हें काम तिगतलें अशें सांगून स्मार्ट सिटीन हाचेर 1200 कोटी रुपया मोडल्यात. पूण प्रत्यक्षांत फक्त 15 दिसांनी, स म्हयन्यांनी ह्या कामांचो बाबत दर्जो दिसून येता. देखून स्मार्ट सिटीच्या कामाचें ऑडीट जावप गरजेचें आसा, अशें मडकयकार हांणी म्हणलें.
हातूंत भ्रश्टाचाराचो आस्पाव आसा हातूंतत कसलोच दुबाव ना. हाचें एक उदाहरण म्हणाल्यार स्मार्ट सिटीन 220 कोटी रुपया रुपया मोडून सीसीटीव्ही कॅमेरा बसयिल्ले. पूण आतां ते कॅमेरा काम करिनात. ह्या कॅमेऱ्यांची कसलीच गरज ना म्हूण आमी पयली विरोध केल्लो. हीं कामां ह्या म्हयन्यांत पुराय जावप शक्य ना. अजूनय 18 जून, महात्मा गांधी रस्त्यार कामां हातांत घेवपाचीं आसात. तशेंच सांतीनेज ते टोंक, शितल हॉटेल ते काकुलो रस्त्या मेरेन बारीक सारीक कामां उरल्यांत. देखून फुडल्या वर्सा मे 31 मेरेन हीं कामां पुराय जातलीं, असो आरोप मडकयकार हांणी केलो.
श्रीताड माड हे टोंक, करंजाळे, सांतीनेज आनी ताळंगावाच्या थळाव्यां खातीर एक जागृत देवस्थान. जेन्ना ह्या देवळाची धड कोसळपाचो व्हिडियो लोकांनी पळयलो तेन्ना तांकां खास करून बायलांक सामकोच धपको बसलो. आपलो दीस सुरू करचे पयलीं लोक सकाळीं ह्या देवाचें दर्शन घेतात. पूण आतां रस्तो बंद आशिल्ल्यान लोकांक दर्शन घेवपाक मेळना, अशे पणजेची आदली नगरसेवक शितल नायक हांणी सांगलें.
फाटलीं 3 वर्सा जालीं ह्या रस्त्याचें काम चालू आसा. बायलां हांगासर वडा पुनव मनयतात. देखून दर वर्सा तांकां चिखलांतल्यान चलचें पडटा. देखून वडा पुनवे दिसा 21 जून मेरेन ताड माड देवस्थानाची धड दुरुस्त करची. गडबड करिनासतना बऱ्या दर्जाचें काम करचें. ते भायर ह्या देवळाच्या दारा मुखारच सिवरेज चेंबर मारला. जर तो ओव्हरफ्लो जायत जाल्यार सगले घाण उदक देवळांत वतलें. देखून तो मात्सो फुडे बांदचो अशें नायक हांणी मागणी केल्या.
कंत्राटदार ह्या बाबत कामा खातीर जापसालदार आसा जाल्यार तांकां काळे वळेरेंत कित्याक घालिनात. आमी मुख्यमंत्र्यांची भेट घेतले आनी बाबत काम करपी कंत्राटदारांक काळे वळेरेंत घालचें, तशेंच ताड माड देवस्थाना कडेन लक्ष दिवपाची मागणी करतले अशें शितल नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
