भांगरभूंय | प्रतिनिधी
पणजी, बातमीदार ः स्मार्ट सिटीच्या कामांत कळाव जावपाक आदले सल्लागार जापसालदार आसात. तांकां लागूनच स्मार्ट सिटीच्या कामांचें नियोजन करपाचें गणित इबाडले. सध्या स्मार्ट सिटीचीं 90 टक्के कामां पुराय जाल्यांत. फुडल्या कांय दिसांत उरिल्लीं कामांय पुराय जातलीं अशें आश्वासन मुख्यमंत्री डॉ.प्रमोद सावंत हांणी दिलें. शेनवारा सकाळीं तांणी पणजेंतल्या स्मार्ट सिटीच्या कामांची पळोवणी केली. ह्या वेळार मंत्री बाबूश मोन्सेरात, महापौर रोहित मोन्सेरात, सीईओ संजीत रॉड्रिग्ज आनी हेर अधिकारी हाजीर आशिल्ले.
मुख्यमंत्र्यान मिडियाक दिल्ले म्हायती प्रमाण स्मार्ट सिटीच्या कामांचो दर्जो समाधानकारक आसा. कांय सुवातींनी कामांत चुको मेळ्ळ्यो जाल्यार संबंदीत कंत्राटदारा कडल्यान तें काम परतून करुन घेतले. हाचे खातीर सरकार अतिरिक्त पयशे खर्च करचो ना. कंत्राटदारांक स्वताच्या पयशांतल्यान हीं कामां करचीं पडटलीं. पावसाच्या दिसांनी पणजेंत उदक भरचें न्हय हे खातीर वेगवेगळे उपाय चालीक लायतात. भरतीच्या वेळार पावस पडल्यार आनी शारांत भरिल्लें उदक काडून उडोवपाचेरुय उपाय करतले.
शारांतल्या कांय लोकांनी सिवरेजाची जोडणी घेवंक ना. स्मार्ट सिटी खाला नवी सिवरेजाची जोडणी घाल्या. थळाव्या लोकांनी ही सिवरेजाची जोडणी घेवप गरजेचें आसा. फुडल्या आठ दिसांत सिवरेजाची नवी जोडणी घेवंक नाशिल्ल्या थळाव्या लोकांची उदक आनी वीज जोडणी तोडटले. स्मार्ट सिटीच्या कामाक लागून पणजेच्या लोकांक जाल्ल्या त्रासा खातीर हांव दिलगिरी व्यक्त करता. पूण कांय जाणांक खर टिका करपाची सवय जाल्या. तांणी रस्त्यार येवन कितें काम जालां तें सारकें पळोवचें अशेंय मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
