स्मार्ट सिटीच्या कामांक लागून जावपी प्रदुशणा संबंदी उच्च न्यायालयांत जनहीत याचिका दाखल
भांगरभूंय | प्रतिनिधी
पणजी, बातमीदार : अनियोजीत स्मार्ट सिटी प्रकल्पाक लागून जावपी गैर वेवस्था आनी धुळीचें प्रदूषण उणे करपाक सरकार आनी इमॅजीन पणजी स्मार्ट सिटी डेव्हलपमेंट कॉर्पोरेशन (IPSCDL) हांकां बेगीन निर्देश दिवचे. अश्यो मागण्यो करपी दोन जनहीत याचिका पणजे रावप्यांच्या एका पंगडान गोंयच्या मुंबय उच्च न्यायालयांत दाखल केल्यात.
हे याचिकेंत IPSCDL हांचे सयत गोंय राज्य प्रदूशण नियंत्रण मंडळ आनी हेर सरकारी एजन्सींक प्रतिवादी केल्या. हे याचिकेचेर फुडल्या मंगळारा सुनावणी जातली.
हे विशीं म्हायती दितना एका याचिका करप्यान सांगलें, स्मार्ट सिटी प्रकल्पांक लागून पणजे धुल्लाचें प्रदूशण वाडलां. गोंय प्रदूशण नियंत्रण मंडळूय (GSPCB) हाची दखल घेवपाक अपेशी थारलां. ताका लागून आमी पणजेकारांक हांतल्यान सुटका मेळची आनी प्रकल्प बेगीन पुराय करपा खातीर उच्च न्यायालयांत हस्तक्षेपाची मागणी केल्या.
पणजे शारांतल्या सगळ्या म्हत्वाच्या सुवातांचेर कायमचे ‘रिअल टाईम एअर म्बियंट क्वालिटी मॉनिटरिंग स्टेशन्स’ स्थापन करात आनी डेटा संकलीत करात. शारांत हातांत घेतिल्ल्या कामांच्या वाठारांतले हवेचे गुणवत्तेच्या मानकांचें परीक्षण करात. तशेंच रिअल टायम डेटा संग्रहीत करपाक आनी सदां पडताळणी करून गरजेचे उपाय करचे, अशी मागणे हे याचिकेंतल्यान केल्या.
पणजे सध्या चालू आशिल्ल्या कामांक लागून सगळे रस्ते विस्कळीत जाल्यात. तेन्ना IPSCDLन महालक्ष्मी देवूळ आनी मुष्टीफंड शाळे लागसारा खणपाचें काम सुरू केलां. शाळेंत सुरू आशिल्ल्या बोर्डाच्या परिक्षांक लागून एके संस्थेन मार्च निमाणें मेरेन कामां फुडें धुकलपाची मागणी केल्ली. मात काम सुरू केलां. ताका लागून गैर वेवस्था आनी धूळ प्रदूशणाचो परिणाम देवळांत दर्शनाक येवप्यांचेर जाल्ल्याची म्हायती सुत्रां कडल्यान मेळ्ळी.
जगतीं, उच्च न्यायालयान फाटल्या वर्सा स्मार्ट सिटीच्या कामांक लागून जावपी येरादारी कोंयंडीची स्वता दखल घेवन येरादारी सचिवांक कृती आराखडो तयार करपाचे निर्देश दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
