भांगरभूंय | प्रतिनिधी
पणजीः रायबंदर रस्त्याचो पुराय धुंवर जाला. ह्या रस्त्यार येरादारी करप म्हणल्यार चंद्रार वचपा सारखी परिस्थिती जाल्या. स्मार्ट सिटीचो सायड इफेक्ट रायबंदरकार अजून मेरेन भोगतात आनी तांकां थाकाय म्हणटात ती केन्ना मेळटली हाचेर प्रस्नचिन्न उप्रासला.
रायबंदर रस्त्यार स्मार्ट सिटीचे सिवरेजीच्या कामांक लागून लोकांचे हाल जाल्ले. पावला पावलार रस्ते फोडून दवरिल्ल्यान लोकांक घरा भायर पडप कुस्तार जाल्लें. केन्ना हें काम सोंपतलें अशी आस्त रायबंदरकार लावन बशिल्ले.
पूण एकदाचें हें काम सोंपलें आनी रस्ते दुरुस्त जाले तरी लेगीत रायबंदरकारांचो अजूनय वनवास सोंपूंक ना. पयलीं खोल खणिल्ल्या फोंडकुलांतल्यान रायबंदरचे थळावे लोक वाट काडटाले आनी पडून हात पांय मोडून घेताले. आतां बाबत रस्त्याच्या कामांक लागून दुश्काळांत तेरावो म्हयनो अशी परिस्थिती रायबंदर वाठाराची जाल्या. ह्या रस्त्यार वयले वयर डांबर घाल्ल्यान पुराय रायबंदरा रस्त्यार शेकरो वयर सरला. येरादारी वेळार दाट धुंवरां भशेन धुल्ल ह्या रस्त्यार पातळटा. समजा कोणूय दुचाकी घेवन ह्या रस्त्या वेल्यान वता ताचे कपडे म्हेळे जालेच म्हूण समजुपाचें.
हांगासर सिवरेजीचीं पायपां घालतकच रस्त्यार मे म्हयन्यांत डांबर घाल्लें. पूण पयल्या पावसांतच हो रस्तो सदचे भशेन व्हांवून गेलो. रस्तो आतां गायब जाला. थंयसर बारीक फोंडकुलां, शेकरो आनी धुल्ल उरला. व्हडल्यो बशी वतना पुराय वाठारांत मोठो धुल्लो तयार जाता आनी धुल्ल लोकांच्या घरांनी, गाडयांचेर वचून बसता. देखून पुराय वाठार मातयेन धांपला. ते भायर शेकर्याचेर दुचाकी घसरून पडटात आनी अपघात जातात.
हे विशीं थळावे साईश म्हांबरो हांणी सांगलें की, रायबंदराच्या रस्त्याचेर पुराय दुर्लक्ष जालां, कोणूच कसलींच पावलां उबारिनाता. थळावो आमदार न्हिदला आनी मंत्रीय न्हिदला.
संंजीत रॉड्रिग्स हांणी पणजे सयत पुराय रायबंदराची वाट लावन उडयल्या. लोकांनी मुद्दाम रायबंदरा भेट दिवची. हो वाठार घेरांत सांपडिल्लो प्रदेश जाला. जर कोणाक ऑफरोड गाडयो चलोवपाची उमेद आसत जाल्यार तांणी ह्या रस्त्यार मुजरत चलोवच्यो, अशें म्हांबरो हांणी सांगलें.
हांगासर धुल्ल सगल्यांक पावला. सद्या मिडल इस्ट देश ज्या घेरांत सांपडला तशी परिस्थिती रायबंदराची जाल्या. हालींच पडिल्ल्या पावसाक लागून आमकां मात्शी थाकाय मेळ्ळ्या. स्मार्ट सिटीचें काम चलतालें तेन्नाय आनी सोंपलें उपरांतूय आमकां थाकाय ना, अशी कागाळ म्हांबरो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
