भांगरभूंय | प्रतिनिधी
स्मार्ट सिटीचीं कामां अडेज म्हयन्यां भितर म्हणल्यार 30 मे मेरेन पुराय करपाचो यत्न करतले, अशें मुख्यमंत्र्यान परत एकदां जाहीर केलां. कामाची गती पळयल्यार तें पुराय जायतशें दिसना. निदान जाणकार तशें सांगतात. हीं कामां बेगीन, वेगान करपाक गरजेच्या सुवातेर चड मनीसबळ नेमपाची सुचोवणीय मुख्यमंत्र्यान केल्या. हाचे पयलीं पणजेच्या म्हापौरान मार्च म्हयनो सोंपता म्हणसर (आनीक 15 दीस उरल्यात.) सगली पणजी चकाचक जातली अशी घोशणां पोरूं डिसेंबरांत केल्ली. पूण ती तारीख पाळपाक स्मार्ट सिटीच्या कंत्राटदारांक अपेस आयलें. निदान आतां तरी मिर्गा पयलीं पणजी चकाचक जावची. सगलीं कामां पुराय जाले उपरांत आख्खे राजधानींतले रस्ते हाॅट मिक्स पद्दतीन डांबरी करचे पडटले…. आनी ते परत कोण खणचे नात वा खणपाचो वेळ येवचो ना, हाचीय जतनाय घेवची पडटली. देखीक सांतिनेजांतलो पीडब्ल्यूडी कुशीचो रस्तो स फावटी फोडला. सिवरेज, वीज, फोन, गटार बांदकाम… अशा साबार कामां खातीर तो फोडला, माती आनी डांबर घालून दुरुस्त केला, परत फोडला, परतून सारको केला. आतां स्मार्ट सिटीचीं कामां सोंपतकच निदान वर्सभर तरी पणजेंतले रस्ते तशेच गुळगुळीत दवरचे!!
कांय जाणांच्या मतान, सिवरेजी सारकीं कामां जावपाक जाय आशिल्लीं. पूण आदली पणजीच बरी आशिल्ली खंय. अर्थांत हो प्रत्येकाचो दृश्टीकोन. केंद्र सरकारान कांय वर्सां पयलीं शारांची उदरगत करपाक स्मार्ट सिटी संकल्पना मुखार हाडली. अब्जांनी रुपया ह्या कामां खातीर राखून दवरले. देशांतल्या बऱ्याच शारांचीं कामां पुराय जाल्यांत. मात, गोंयांतलें काम फाटलीं तीन- चार वर्सां चालूच आसा. मुळांत केंद्र सरकाराची घोशणा जावन आनी दुडू येवन पसून तें सुरू जावंक नासलें. मागीर पयसो परतून वचपाचो वेळ आयलो तेन्ना अचकीत धडाधड कामां सुरू जालीं. पूण तातूंत ताळमेळ, नियोजन नाशिल्ल्यान लोकांचे खूब- खूब हाल जाले. कारण सगलेच कडेन खणून दवरिल्लें. एके कडेन माती घालून सारकें करता म्हणसर दुसरे कडेन फोंड मारताले. अजून हें चालूच आसा. राजधानींत येवपी गाडयेकाराक खंयचे रस्ते वन वे आनी खंयचे रस्ते बंद तेंच कळना जालां. हीं कामां पुराय जालीं काय फुडलीं 20 वर्सां तांकां हात पसून लावपाची गरज पडची ना, अशीय प्रतिक्रिया तीन म्हयन्यां पयलीं एकल्यान उक्तायिल्ली. हाचो अर्थ दर्जो सामको उंचेलो आसतलो तर.
स्मार्ट सिटीच्या कामांक लागून गाडयेकार, चलत वचप्यांक त्रास जाले, अजून जातात, ही गजाल खरी. पूण, खरें लुकसाण जालां तें गाडे, ल्हान वेवसाय करप्यांचें. अर्थांत व्हडल्या दुकानांच्या, हाॅटेलांच्या वेवसायाक पसून धपको बसला. दुकानां कडेन वचपाची वाटूच बंद जाल्ल्यान, कांय रस्ते बंद केल्ल्यान येरादारी, लोकांची वर्दळ उणी जाल्या. मातयेच्यो राशी, फोंडकुलांक लागून चलपाक मेळना म्हूण नागरिकांनी भायर भोंवप बंद केलां. हाचो परिणाम वेपाऱ्यांचेर जाला. कांय कडेन खणून दवरिल्ल्यान लांकडाचे गाडे दुसरे कडेन व्हेल्यात. ते परत आपल्या जाग्यार येतले केन्ना आनी सुरू जातले केन्ना तें कोणाकूच खबर ना. कांय थारावीक जाग्यांचेर जे बसून वेवसाय करताले तांकां साटली- पोटली कवळून घरा वच्चें पडलां. आतां मिर्गाच्या पावसांत सृश्टीचें चित्र बदलतलें, तशें पणजे पोट भरपाक येवपी वेपाऱ्यांचेंय भाग्य बदलचें, तांकां बरे दीस येवचे.
स्मार्ट सिटी जातकच पणजे शाराच्या भायल्या, म्हणल्यार सध्याच्या मार्गाचेर ईव्ही (इलेक्ट्रीक) बशी धांवतल्यो. 15 वर्सां चलपी बशी बंद जातल्यो आनी नव्यो खाजगी बशी सरकार दुसऱ्या मार्गाचेर चलोवपाक घेतलें. तातूंत एप्रीलाच्यान भितरल्या मार्गांचेर खाजगी बसी चलतल्यो. तांकां तीन पर्याय दिल्यात, अशें थळाव्या आमदारान म्हणलां. पूण, ते तयार जावपाक जाय. स्मार्ट सिटी खाला नवे बस स्टाॅप उबारपाचें काम चल्लां. तें थांबोवपाचो आदेश सरकारान दिल्यात. कारण म्हापालिके वांगडा भासाभास करिनासतना हे स्टाॅप घाल्यात, तेय बी बशी रावनात थंय. बशींची तिकेट पद्दतूय आधुनीक जातली. ह्यो भितरल्यो बशी रातच्यो णव मेरेन तरी आसच्यो. तशें केल्यार शारांत भितर येवपी दुचाकी आनी हेर गाडयांचो आंकडो उणो जातलो. अपघातांचेर नियंत्रण येतलें. प्रदुशण उणें जातलें. पणजे भायर वचपाक रातीं 10 मेरेन बसी दवरल्यात दुदांत साकर.
स्मार्ट सिटीचीं सगलीं कामां 30 मे मेरेन पुराय जावपाकूच जाय. कारण एकदां पावस सुरू जालो काय मागीर पणजेचें कांय खरें नासता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
