भांगरभूंय | प्रतिनिधी
मानवाधिकार आयोगाची दखल : 2 जूनाक सुनावणी
भांगरभूंय । प्रतिनिधी
पणजी : पणजी : फाटले कांय दीस वीज खात्या कडल्यान तयार केल्ल्या स्मार्ट वीज मिटरा वयल्यान वाद चालू आसा. वीज खात्यान अशे मिटर लावप सक्तीचें आसात, अशें सांगतात. मात कांय समाज कार्यकर्ते, एनजीओंनी अशी कसलीच सक्ती करपाक मेळना, अशें म्हणिल्लें. आतां ह्या वादाची दखल मानवाधिकार आयोगान लेगीत घेतल्या. हे विशीं आयोगान खात्याच्या मुख्य अभियंत्याक नोटीस जारी केल्या. आयोगान मुख्य अभियंतो वा ताच्या प्रतिनिधीक 2 जूनाक सुनावणेक हाजीर रावपाक सांगलां. आयोगान ह्या प्रकरणाची स्वेच्छा दखल घेतल्या.
स्मार्ट मिटर बसोवप सक्तीचें केल्यार मानवधिकारांचें उल्लंघन जावपाची शक्यताय आशिल्ल्याचें आयोगान म्हणलां. वीज खात्याक 2 जूनाक हे विशींची जाप वा अहवाल लेगीत सादर करचो पडटलो. हे आदीं खात्यान बिरेस्तारा 7 मेक नोटीस जारी करून स्मार्ट मिटर सक्तीचें केल्ल्याचें स्पश्ट केल्लें. मात सिटिझन्स ऑफ डेमोक्रसी हे संघटणेन हे सक्तीक विरोध केल्लो. केंद्रीय मंत्र्यान संसदेंत अशी सक्ती जावची ना, अशें स्पश्ट केल्ल्याचें तांणी सांगिल्लें.
वीज खात्यान नोटिशेंत म्हणलां, सध्याच्या वीज मिटराचे सुवातेर डिजिस्मार्ट नेटवर्क्स हांचे वतीन स्मार्ट मिटर बलोवपाची प्रक्रिया ह्या खात्यान सुरू केल्या. संयुक्त वीज नियामक आयोगाच्या (जेईआरसी) नेमां प्रमाण अशें मिटर बसोवप सक्तीचें आसा. तशेंच केंद्र सरकारान निर्देश दिल्ले वेळाचे मर्यादे भितर मिटर बसोवपाची प्रक्रिया पुराय करप गरजेचें आसा. मिटर बसोवपाचे प्रक्रियेंत गिरायकां कडल्यान आदार दिवचो. स्मार्ट मिटराच्या अत्याधुनीक तंत्रज्ञानाक लागून गिरायक तशेंच खात्याक लेगीत फायदो जातलो. स्मार्ट मिटराक लागून विजेचो वापर रिअल टायम डेटाचें विश्लेशण करून विजेचो कार्यक्षम वापर करप शक्य जातलें. खात्या वतीन वेंचिल्ले डिजिस्मार्ट नेटवर्क्स प्रा. लि. हांचें प्रशिक्षीत कर्मचारी मिटर बदलतले. तांचे कडेन वीज खात्यान जारी केल्लीं वैध वळखपत्रां आसतलीं. कसलीय म्हायती दिवप, मिटर बदलपाक मान्यताय दिवचे आदीं गिरायकांनी ह्या कर्मचाऱ्यांची वळखपत्रांची तपासणी करची, अशें नोटिसेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
