भांगरभूंय | प्रतिनिधी
भांगरभूंय । खेळां मेज
पणजीः आय लीग सर्ती खातीर पात्र थारपाची स्पोर्टिंग क्लबद दी गोवाची आस्त आयतारा सोपली. वास्कोच्या टिळक मैदानार जाल्ले सेकंड डिव्हिजन विभागील आय लीग फुटबॉल सर्तींत गोंयच्याच धेंपो स्पोर्ट्स कल्बा कडल्यान तांकां 1-0 अशा गोलांनी हार खावची पडली. मॅचींतलो व्हो निर्णायक म्हत्वाचो गोल 51व्या मिनटाक शुभम राऊत हाणे केलो.
ह्या जैतान धेंपोन 13 मॅचींतल्यान 24 गुण मेळोवन आपली दुसरी नंबराची सुवात आनीक घटमूट केली. एससी बेंगळुरून तांच्यो दोन मॅची बाकीआसतनाच आय लीग सर्तीतलो आपले प्रवेश निश्चीत केला. स्पोर्टिंग क्लब दी गोवा 19 गुणांनी सध्या पांचवे सुवातेर आसा. आपले निमणे लीग मॅचींत येता त्या शेनवारां तांकां युनायटेड एससीशी कडेन खेळचें पडटलें. दुसरे सुवाते सयत आय लीग सर्ती खातीर पात्र थारपा खातीर धेंपो क्लबाक सुदेवा दिल्ली हांच्या 23 गुणां कडेन बरोबरी केल्यार लेगीत पुरो आसतलें.
आय लीग सर्ती खातीर पात्र थारपाचे सर्तींत रावपा खातीर स्पोर्टिंगाक आयतारा धेंपो क्लबाचेर जैत मेळोवपाची सामकी गरज आशिल्ली. कोच आर्मांदो कुलासो हाणे हे मॅची खातीर महाराष्ट्र ऑरेंज एफसी कडल्यान 0-3 अशी हार खावपी स्पोर्टिंगाच्या पंगडांत तीन बदल केले. गोलकी म्हणून अभिमन्यू सिंग हाका संद दिली. धेंपो क्लबान मॅचीचे सुरवेक सावन आक्रमक खेळ केल्ल्यान अभिमन्यूचो सामको कस लागलो. स्पोर्टिंगाक मैदानार जमून घेवपा खातीर मात्सो वेळ घेतलो. अर्द वराचो खेळ जाल्लो तेन्ना तांका गोल करपाची उक्ती संद मेळल्ली क्लुझनर परेराच्या क्रॉसाचेर जॉयनस गांवकार हाणे हेडरान गोल करपाचो केल्लो यत्न बॉल गोलपोस्टा वयल्यान गेल्ल्यान फळादीक जावपाक शकलो ना.
हे उपरांत बिस्वा दार्जी हाणे बरी चाल रचली मात ऑलिस्टर वा जॉयसन हांकां अचूक पास दिवपाक तो कमी पडलो. हाफ टायमाक स मिनटां बाकी आसतना शुभम राऊतान गोल कोंयडी फोडली. ताची हाफ व्हॉली गोलकी अभिमन्यू हाणे उडकी घेवन लेगीत ताकां आडावपाक जाली ना आनी धेंपोक 1-0 गोलांची आघाडी मेळ्ळी.
व्हो गोल जाल्या उपरांत स्पोर्टिंगाच्या खेळाक धार आयली मात ऑलिस्टर आनी डॉयल हांका गोल लक्ष्य सादपाक येस मेळ्ळें ना. 89 व्या मिनटाक स्पोर्टिंगाचो कॅप्टन जोयल कुलासो हांका दुसरे फावट येलो कार्ड मेळिल्ल्यान ताका मैदान सोडचें पडलें आनी तांका निमणे एकसुऱ्या गोलान हार खावची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
