भांगरभूंय | प्रतिनिधी
दोन वर्सां पयलीं कालच्या दिसा म्हणल्यार 4 मार्च 2022 दिसा क्रिकेट विश्वाक धक्को दिवपी बातमी आयली आनी हे बातमेन क्रिकेट विश्वाचेर दुख्खाची सया पातळ्ळी. ही बातमी आशिल्ली स्पीन बॉलिंगेचो जादुगार ऑस्ट्रेलियाचो लेग स्पिनर शेन वॉर्न हाच्या मरणाची. शेन वॉर्नाक आयिल्ल्या अचकीत मरणाची बातमी क्रिकेट रसीक पचोवंक शकले नात. खूबशा जाणांचेर हे बातमीचेर विस्वास नाशिल्लो. शेन वॉर्न असो अचकीत संवसार सोडून गेल्ल्यान क्रिकेट विश्वाक धक्कोच बसलो. शेन वॉर्न वचून काल (सोमारा) दोन वर्सां जालीं तरी ह्या धक्क्यांतल्यान क्रिकेट रसीक अजुनूय सावरूंक शकले नात. पिरायेच्या अवघ्या 52 व्या वर्सा ह्या व्हड बॉलरान जगाचो निरोप घेतलो. शेन वॉर्न हो फक्त ऑस्ट्रेलियाचोच न्हय जाल्यार संवसारांतलो नामनेचो स्पीन बॉलर आशिल्लो. आपले स्पीन बॉलिंगेचेर ताणें संवसारांतल्या सगल्याच बॅटसमनांक नाचयले. सुमार 20 वर्सां ताणें आपल्या बॉलिंगेच्या बळार क्रिकेट विश्वाचेर राज्य केलें.
13 सप्टेंबर 1969 दिसा ऑस्ट्रेलियाच्या फॉन्टरी गली हांगा जल्मल्ल्या शेन वॉर्नान जेन्ना स्पीन बॉलींग घालपाचो निर्णय घेतलो तेन्ना ताका सगल्यांनी पिश्यांत काडिल्लो. कारण ऑस्ट्रेलिया म्हणल्यार फास्ट बॉलरांची भूंय. खेळपट्ट्यो वेगवान. ताका लागून थंय ताची स्पीन बॉलींग चलची ना अशेंय सगल्यांचें मत आशिल्लें. खूबशा जाणांनी ताका स्पीन बॉलींग करची न्हय असो सल्लो दिलो. पूण ताणें कोणाचेंच आयकलें ना. तो आपल्या निर्णयाचेर ठाम रावलो.
देशांतर्गत क्रिकेटींत ताणें तोखणायेची कामगिरी करून निवड समितीचें लक्ष आडून घेतलें. सेगीत बरी बॉलींग केल्ल्यान निमाणें ताका ऑस्ट्रेलियाच्या मुखेल पंगडांत प्रवेश मेळ्ळो. 1992 वर्सा तो भारता आड पयली टॅस्ट मॅच खेळ्ळो. पूण हे मॅचींत ताका विशेश अशी चमक दाखोवंक जमली ना. भारताच्या बॅटसमनांनी ताची बॉलींग सहजतायेन खेळून काडली. हेच टॅस्ट मॅचींत भारताचो ओपनर रवी शास्त्रीन दोट्टी शेंकडो मारिल्लो. पयले टॅस्ट मॅचींत विशेश अशें कांयच करूंक जमलें ना म्हूण ताचेर टिकाय जाली. तो आंतरराष्ट्रीय पांवड्यार येसस्वी जावचो ना असोय तर्क खूबशा जाणांनी काडलो. पूण ताणें हार मानली ना. टिकाकारां कडेन आडनदर केली आनी आपले बॉलिंगेचेर लक्ष केंद्रीत केलें. ताचें फळ ताका रोखडेंच मेळ्ळें. इंग्लंडा आडच्या प्रतिश्ठेच्या अॅशेस माळेंत ताणें इंग्लंडाच्या बॅटसमनांक नाका पुरो करून सोडलो. आपले स्पीन बॉलिंगेच्या बळार ताणें ही माळ ऑस्ट्रेलियेक एका हातान जिखून दिली.
इंग्लंडाच्या बॅटसमनांक शेन वॉर्नाची स्पीन बॉलींग कळ्ळीच ना. इंग्लंड बॅटसमनांक शेन वॉर्नान अक्षरशा मामा केलो. हेच माळेंत शेन वॉर्नान असो एक बॉल घालो की जाणें बॅटसमनूच न्हय जाल्यार क्रिकेट विश्वूच अजापीत जालें. शेन वॉर्नान इंग्लंडाच्या मायक गॅटींगाक ऑफ सायडीक बॉल घालो. गॅटींगाक दिसलें बॉल ऑफ स्टंपा भायर आशिल्ल्यान तो व्हायड थारतलो म्हणून ताणें तो सोडून दिलो. पूण तोच बॉल अचकीत 180 अंशांत वळ्ळो आनी गॅटींगेची लेग स्टंप घेवन गेलो. ह्या बॉलान फक्त बॅटसमॅनूच न्हय जाल्यार क्रिकेट विश्वूय अजापीत जालें. असो बॉल हाचे पयलीं क्रिकेट विश्वांत खंयच्याच बॉलरान घालूंक नाशिल्लो. म्हणूनच ह्या बॉलाक बॉल ऑफ सेंच्युरी अशें म्हणटात. न भुतो न भविश्यती असो तो बॉल आशिल्लो. 1993 वर्सा शेन वॉर्नान हो बॉल घाल्लो. आयज इतल्या वर्सांनी लेगीत हो बॉल क्रिकेट रसिकांचे यादींत आसा.
शेन वॉर्नाची बॉलिंगेची स्टायल आगळी वेगळी आशिल्ली. हे वेगळे शैलिनूच ताणें 145 टॅस्ट मॅचींत 708 विकेटी घेतल्यो. तातूंतले 448 विकेटी ह्यो ऑस्ट्रेलिया आनी इंग्लंडांत घेतल्यो. हांगा एक लक्षांत घेवचें पडटलें की ह्या दोनूय देशांतल्यो खेळपट्ट्यो फास्ट बॉलरां खातीर पोशक आसतात. ह्या खेळपट्ट्यांचेर इतल्यो विकेटी घेवप म्हणल्यार सादारण गजाल न्हय. ताणें 145 टॅस्ट मॅचींत खेळटना 37 फावटी एका डावांत 5 वा ताचे परस चड विकेटी घेतल्यात. जाल्यार टॅस्ट मॅचींत 10 वा 10चे परस चड विकेटी ताणें 10 फावटी घेतल्यात. इतलेंच न्हय तर ताणें 194 एका दिसाच्या मॅचींनी 293 विकेटी घेतल्यात. 1999 वर्सा इंग्लंडांत जाल्ल्या संवसारीक करंड क्रिकेट सर्तींत ऑस्ट्रेलियान शेन वॉर्नाच्या स्पीन बॉलिंगेच्या बळारूच संवसारीक करंड जिखिल्लो.
शेन वॉर्नान संवसारांतल्या दिग्गज बॅटसमनांक आपल्या स्पीन बॉलिंगेच्या तालार अक्षरशा नाचयले. संवसारांतल्या सगल्यांच देशांनी ताणें अप्रतीम कामगिरी करून विकेटी घेतल्यो. पूण ताका भारतांत मात व्हडलेशें येस मेळ्ळें ना. सचीन आनी वॉर्न हांचे क्रिकेट मैदाना वेलें झूज क्रिकेट रसिकां खातीर पर्वणीच थारताली. सचीनाक आवट करपा खातीर वॉर्न खूबशे फावटी वेगळे वेगळे तरेन यत्न करतालो, पूण ताका येस आयलें ना. शारजांत जाल्ले माळेंत सचीनान वॉर्नाक बरोच फोडून काडिल्लो तेन्ना सचीन म्हाका सपनातूय दिसता अशी कबुली ताणें दिल्ली. मैदानार हे दोन दिग्गज खेळगडे एकामेका सामकार उबे रावत आसले तरी मैदाना भायर मात हे दोगूय बरे इश्ट आशिल्ले. 1990 ते 2010 अशीं 20 वर्सां ऑस्ट्रेलियान क्रिकेट विश्वाचेर एकाहातान हुकूमत गाजयली तातूंत शेन वॉर्नाचो मोटो वांटो आशिल्लो.
निवृत्ती उपरांत शेन वॉर्नान समालोचन केलें. 2008 वर्सा आयपीएलाचें पयलें सत्र जालें. ह्या पयल्या सत्रांत शेन वॉन राजस्थान रॉयल्स पंगडाचो मुखेली आशिल्लो. विशेश म्हणल्यार ह्या पंगडांत शेन वॉर्न सोडून एकूय स्टार खेळगडो नाशिल्लो. ह्या पंगडांत तरणाटे आनी नव्या खेळगड्यांचो आस्पाव आशिल्लो. तरी लेगीत शेन वॉर्नान आपल्या बॉलिंगेचेर आनी अणभवान राजस्थान रॉयल्साक जैत मेळोवन दिलें.
शेन वॉर्नाच्या मरणा उपरांत क्रिकेट विश्वाचें मोटें लुकसाण जालें. ताचे सारको स्पीन बॉलर परतून जावचो ना. स्पीन बॉलिंगेचो जादुगार शेन वॉर्नाक दुसऱ्या स्मृती दिसा निमतान नमळायेचीं आर्गां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
