स्पीड ब्रेकराक लागून दोगांनी व्हगडायलो जीव

भांगरभूंय | प्रतिनिधी

बांदकाम खात्यान गंभीरतायेन लक्ष दिवपाची मागणी

फोंडें: ढवळी आनी धारबांदोड्यां रातच्या वेळार स्पीड ब्रेकराचेर स्कुटरी वेलो ताबो सुटून 7 दिसांत दोगांक मरण येवपाचे प्रकार फोंडें पुलीस स्टेशनार नोंद जाल्यात. राष्ट्रीय रस्तो सुरक्षा म्हयनो सुरू आसतना अपघाताची संख्या वाडत आशिल्ल्यान हुस्क्याचो विशय थारला. फोंडकुलांनी भरिल्ले रस्ते तशेंच रस्त्या वेले सुचोवणी तकटे स्पश्ट दिसनाशिल्ल्यान वाडटे अपघात आडावपा खातीर ताकतिकेन उपाय काडपाची गरज आसा.

फोंडें पुलीस शिमेंत सात दिसां भितर स्पीड ब्रेकराक लागून स्कुटर रस्त्यार पडून दोन अपघातांत दोगांक मरण येवपाची घडणूक घडली. ताचे वेल्यान रस्त्या वेले घातक स्पीड ब्रेकर अपघातांक आमंत्रण दीत आशिल्ल्याचें दिसून येता. ढवळे 7 वेर जाल्यार धारबांदोड्यां 12 वेर अपघात घडलो. म्हत्वाचें म्हणल्यार दोनूय अपघात रातच्या वेळार घडले.

धारबांदोड्यां उपजिल्होधिकारी कचेरे मुखा वेल्या रस्त्यार रातच्या वेळार रस्त्या वेल्यो लायटी पेटत नाशिल्ल्यान काळोख आसता अशी कागाळ थळाव्या लोकांची आसा. ताका लागून स्पीड ब्रेकर वाहन चालकांक सुचोवणी दिवपी फलका सयत रस्त्या वेल्यो लायटी पेटप म्हत्वाचें थारलां. दोनूय अपघातांत चालकांक स्पीड ब्रेकराचो अदमास येवंक नाशिल्ल्याचें अपघाता वेल्यान दिसून येता. ते खातीर बांदकाम खात्याच्या अभियंत्यांनी स्पीड ब्रेकरा संबंदी गरजेचे उपाय काडचे अशी थळाव्या लोकांची मागणी आसा.

कोडार-बेतोड्यां ज्ञानेश्वर खांडेपारकार हांणी रस्त्या वेले स्पीड ब्रेकर सद्या अपघातांक आमंत्रण दीत आशिल्ल्याचें दिसून येता. कांय सुवातांनी फलक नाशिल्ल्यान तशेंच रातच्या वेळार काळोख पातळिल्ल्यान दुचाकी चालक पडून जखमी जावपाचे प्रकार वाडल्यात. फाटल्या सात दिसांत फोंडें पुलीस शिमेंत स्पीड ब्रेकराक लागून अपघात घडले आनी दोगांचे जीव गेले. ते खातीर बांदकाम खात्यान हातूंत गंभीरतायेन लक्ष दिवपाची गरज आशिल्ल्याचें तांणी सांगलें.

बांदकाम खात्याचे सहाय्यक अभियंते आनंद वाघुर्मेंकार हांणी न्यायालयाच्या आदेशा प्रमाण राष्ट्रीय म्हामार्गा वेले सगले स्पीड ब्रेकर फुडल्या दोन म्हयन्यांत काडपा खातीर प्रक्रिया सुरू केल्या. तशेंच गरज आसा थंय चालकांक सुचोवणी फलक लायतले अशें तांणी म्हणलें.