भांगरभूंय | प्रतिनिधी
एजन्सीं कडेन चर्चा करून उपाय काडपाची संचालकाची हमी
पणजी: वाहनांक ‘स्पीड गव्हर्नर’ बसोवपाच्या सरकाराच्या सक्ती उपरांत ब्ल्यू टॅक्सी संघटणेचे फुडारी भास्कर नारुलकार हांच्या फुडारपणा खाला संघटणेच्या पदाधिकाऱ्यांनी बुधवारा येरादारी संचालक पी. अभिषेक हांची भेट घेतली, आनी पयशे घेवन लेगीत ‘स्पीड गव्हर्नर’ बसोवंक नाशिल्ल्या तिनूय खाजगी एजन्सीं आड तांचे कडेन कागाळ केली.
ह्या तिनूय एजन्सीं कडेन चर्चा करून ह्या विशयाचेर उपाय काडपाची हमी संचालकांनी दिल्ल्याची म्हायती नारुलकार हांणी पत्रकारां कडेन उलयतना दिली.
गोंयांतल्या वाडट्या अपघातांचे फाटभुंयेर रेंट अ कॅब तशेंच म्हाल व्हरपी वाहनांक ‘स्पीड गव्हर्नर’ची सक्ती करतले अशें येरादारी मंत्री मॉवीन गुदिन्हो हांणी कांय दिसां पयलीं जाहीर केल्लें. पूण ‘स्पीड गव्हर्नर’ बसोवपा खातीर नेमिल्ल्यो तीन एजन्सी आनी येरादारी खात्यान मिलीभगत करून हातूंत घोटाळा केल्ल्याचो दावो सद्या कांय वाहन धनी करतात.
‘स्पीड गव्हर्नर’ बसोवपा खातीर येरादारी खात्यान कांय वर्सां पयलीं ‘जेमिनी’, ‘रोजमार्टा’ आनी ‘सेक्युरिनेस’ अश्या तीन एजन्सींची नेमणूक केल्ली. रेंट अ कॅब, पर्यटक, यलो-ब्लॅक टॅक्सी तशेंच हेर म्हाल व्हरपी वाहनांक ‘स्पीड गव्हर्नर’ बसोवपाचे निर्देश दिल्ले. ते प्रमाण ह्या एजन्सींक ‘स्पीड गव्हर्नर’ खातीर कांय जाणां कडल्यान 4,500 जाल्यार कांय जाणां कडल्यान 6,500 रुपया वसूल केले. पूण तांच्या वाहनांक ‘स्पीड गव्हर्नर’ न बसयताच तांकां प्रमाणपत्र दिल्लें. ह्याच प्रमाणपत्राच्या आदारान येरादारी खात्यान त्या वाहनांक फिटनेस प्रमाणपत्रूय दिलें.
आतां सरकारान ‘स्पीड गव्हर्नर’ची सक्ती केल्ल्यान वाहन धनयांक हे खातीर परतून पयशे मेजचे पडटले. ताका लागून वाहन धनयांनी ह्या तिनूय एजन्सींचे कचेरेंत वचून जापूय विचारपाक सुरवात केल्ली. निमाणे ब्ल्यू टॅक्सी सेवेंतल्या कार धनयांनी मंगळारा येरादारी संचालकांची भेट घेवन हाचेर उपाय काडपाची मागणी तांचे कडेन केली. ते प्रमाण वाहन धनयांचो हो प्रस्न रोखड्या रोखडो सोडोवपाची हमी तांणी दिल्ल्याचेंय नारूलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
