भांगरभूंय | प्रतिनिधी
चायनामॅन कुलदीप यादव आनी ऑफ स्पिनर आर आश्विन हांच्या प्रदर्शनाच्या नेटार पांचवे टॅस्टीच्या पयल्या दिसा इंग्लंडाचो पयलो डाव 218चेर सोंपोवपाक भारताक येस आयलें. पयल्या दिसाचो खेळ सोंपलो त्या वेळार भारतान आपल्या पयल्या डावांत 1 विकेट वगडावन 135 धांवड्यो केल्यात. युवा बॅट्समन यशस्वी जयस्वाल (57) आनी मुखेली रोहीत शर्मा (खेळटा 52) हांणी अर्द शेंकडे मारले. तशेंच तांणी पयले विकेटी खातीर 104 धांवड्यांची भागिदारी करून भारताक बरी सुरवात करून दिली.
पयल्या दिसाचो खेळ सोंपलो त्या वेळार यशस्वी वांगडा शुभमन गिल (26) खेळपट्टीचेर आसा. भारत आतां इंग्लंडा परस फकत 83 धांवड्यांनी फाटीं आसा आनी ताच्यो 9 विकेटी हातांत आसात.
ते पयलीं कुलदीपान (5-72) इंग्लंडाचो डाव गडगडावन उडोवपाक मोलादीक हातभार लायलो. ताका आश्विनाची बरी साथ मेळ्ळी. ताणें 51 धांवड्यो दिवन 4 विकेटी घेतल्यो. रवींद्र जडेजान 1 विकेट मेळयली. अशे तरेन सगल्यो विकेटी स्पिनरांनी मेळयल्यो.
इंग्लंडाचो मुखेल बेन स्टोक्सान टॉस जिखून पयलीं बॅटींग करपाचो निर्णय घेतलो. ताची सुरवात लेगीत बरी जाली. ओपनर जॅक क्रावली आनी बेन डकेट हाणें पयले विकेटी खातीर 64 धांवड्यांची भागिदारी केली. ही जोडी कुलदीप यादवान फोडली. ताणें डकेटाक तंबूंत धाडलो. ते उपरांत ओली पोपान क्रॉवली वांगडा मेळून डाव मुखार व्हेलो.
हे मजगतीं, क्रावलीन अर्द शेंकडो पुर्ण केलो. इंग्लंडाक 100चेर दुसरो धपको बसलो. कुलदीपान ओली पोपाक बाद केलो. पोपाक 11 धांवड्यो करप शक्य जाल्यो.
पयल्या सत्रांत इंग्लंडान 25.3 ओव्हरींनी सुमार चाराचे रनरेटीन धांवड्यो केल्यो. 137चेर इंग्लंडाक तिसरो धपको बसलो. कुलदीपान हे खेपे फॉर्मांत आशिल्ल्या क्रावलीक बाद केलो. ताणें 108 बॉलांक तोंड दितना 79 धांवड्यो केल्यो. हातूंत 11 चवक्यांचो आनी एका सक्याचो आस्पाव आशिल्लो.
क्रावली बाद जाल्या उपरांत इंग्लंडाचो डाव गडगडलो. 175च्या स्कोराचेर इंग्लंडाक एका फाटल्यान एक अशे तीन धपके बसले. पयलीं कुलदीपान जॉनी बॅयरस्टोक बाद केलो. हे विकेटी सयत कुलदीपान टॅस्टींत आपल्यो 50 विकेटी पुर्ण केल्यो. फुडले ओव्हरींत जडेजान जो रुटाक एलबीडब्ल्यू बाद केलो. ते उपरांत फुडले ओव्हरींत कुलदीपान इंग्लंडाचो मुखेली स्टोक्साक तंबूची वाट दाखयली.
ते उपरांत आश्विनान आपले 100वे टॅस्टींत खेळटना एकेच ओव्हरींत दोन विकेटी घेतल्यो. ताणें टॉम हार्टली आनी मार्क वुड हांकां बाद केले. जेवणाच्या विसवा मेरेन बरे स्थितींत दिवपी इंग्लंडाची च्याच्या विसवा मेरेन 8 बाद 194 अशी बिकेट स्थिती जाली. च्याच्या विसवा उपरांत ताका णववो धपको बसलो. आश्विनान फोक्साक बाद केलो. निमाणी विकेट लेगीत आश्विनानूच घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
