भांगरभूंय | प्रतिनिधी
गोंय आयटी धोरणाक २०२७ मेरेन मुजतवाड
पणजी : गोंय आयटी धोरणा प्रमाण स्टार्ट अप वा आयटी उद्येगांक अनुदान वा सवलती दिवपा खातीर खासा उच्चाधीकार समिती स्थापन जाल्या. मुख्यमंत्री डॉ. प्रमोद सावंत हांच्या फुडारपणा खाला स्थापन जाल्ले समितीचे १५ वांगडी आसा. इतले मजगती आयटी धोरणाक मुजतवाड दितना धोरण १५ ऑगस्ट २०२७ मेरेन लागू उरतलें. हे विशींची अधिसुचोवणी सरकारान जारी केल्या.
स्टार्ट अप तशेंच म्हायती तंत्रज्ञान (आयटी) उद्देगांक उर्बा दिवपा खातीर सरकारान आयटी धोरण २०१८ वर्सा तयार केलें. हें धोरण १५ ऑगस्ट २०२७ मेरेन लागू उरतलें. ह्या धोरणा खाला सरकारान उच्चाधीकार समिती स्थापन केल्या. स्टार्ट अप तशेंच आयटी उद्येगांचेर नदर दवरपा सयत अनुदानाविशींचो निर्णय उच्चाधीकार समिती घेतली. स्टार्ट अपा खातीर आयिल्ल्या अर्जांचो विचार करून अनुदानाची रक्कम उच्चाधीकार समिती थारायतली. समितीची म्हयन्यांतल्यान एकदां तरी बसका जातली.
म्हायती तंत्रज्ञान मंत्री रोहन खंवटे हे समितीचे जोड अध्यक्ष आसतले. उद्देग मंत्री मॉवीन गुदिन्हो, आयटीजी अध्यक्ष, मुखेल सचीव, अर्थ सचीव, शिक्षण सचीव, उद्देग सचीव, म्हायती तंत्रज्ञान सचीव, म्हायती तंत्रज्ञान संचालक, उद्देग संचालक, जीआयटीडीसीचे वेवस्थापकी संचालक, आयटीजी वेवस्थापकी संचालक हे समितीचे हेर वांगडी आसतले. गोवा चेंबर, सीआयआयचे प्रतिनिधी आनी दोन उद्देजक समितीचे वांगडी आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
