भांगरभूंय | प्रतिनिधी
भांगरभूंय । प्रतिनिधी
पणजी: गोंय सरकारच्या म्हायती तंत्रज्ञान, इलेक्ट्रॉनिक्स आनी संचार विभागान आयोजीत केल्ल्या गोंय स्टार्टअप अॅक्सेलरेटर (जीएसए) कार्यावळींत वांटेकार जाल्ल्या 26 स्टार्टअप्सांनी गुंतवणूकदार, उद्देग तज्ञ आनी स्टार्टअप मार्गदर्शकांच्या समिती मुखार आपल्यो वेवसायीक कल्पना सादर केल्यो. हे कार्यावळीक लागून स्टार्टअप्सांक आपलीं उत्पादनां आनी सेवा सादर करपाची, अणभवी गुंतवणूकदार आनी उद्देग तज्ञां कडल्यान मार्गदर्शन मेळोवपाची तशेंच फुडारांतलें मार्गदर्शन, भागिदारी आनी गुंतवणुके खातीर संपर्क निर्माण करपाची मोलादीक संद मेळ्ळ्या.
12 फेब्रुवारी 2026 दिसा सुरू जाल्ल्या गोंय स्टार्टअप अॅक्सेलरेटर कार्यावळीक विवीध मळार उद्देजकां कडल्यान 218 परस चड अर्ज मेळ्ळे. खर निवड प्रक्रिये उपरांत 64 स्टार्टअप्साची निवड केली. 30 आनी 31 मार्च दिसा जाल्ल्या पयल्या डेमो डेमांत 47 स्टार्टअप्सांनी आपले प्रकल्प सादर केले. उपरांत फुडल्या टप्प्या खातीर 26 स्टार्टअप्साची निवड केली. फुडल्या पांच म्हयन्यांत ह्या 26 संस्थापकांनी संरचीत मार्गदर्शन, तज्ञांचें मास्टरक्लास, ब्रँडींग आनी अर्थीक नियोजन कार्यशाळा, गुंतवणुकदारां मुखार सादरीकरणाची तयारी आनी अणभवी उद्देजक, गुंतवणुकदार आनी उद्देतज्ञां सयत प्रत्यक्ष संवाद अशा विवीध उपक्रमांनी वांटो घेतलो.
ह्या पिचींग सत्रा उपरांत गुंतवणुकदार निवडक स्टार्टअप्सांक फुडले मार्गदर्शन दितले. तांचे मदीं गुंतवणूक करपाच्या संदीचोय अभ्यास करतले. मार्गदर्शन, बाजारपेठेची म्हायती आनी गुंतवणुकदारा मेरेन थेट पोच उपलब्ध करून दीत गोंय स्टार्टअप अॅक्सेलरेटर कार्यावळ गुंतवणुके खातीर सज्ज स्टार्टअप्स तयार करतात. हे स्टार्टअप्स रोजगार निर्मिती, गुंतवणक आकर्शीत करप आनी नवोपक्रमाचेर आदारीत अर्थीक विकासाक चालना दिवपाक म्हत्वाची भुमिका वठयतले.
म्हायती तंत्रज्ञान, इलेक्ट्रॉनिक्स आनी संचार मंत्री रोहन खंवटे हांणी म्हणलें, गोंय स्टार्टअप अॅक्सेलरेटर कार्यावळीचो उद्देश संवसारीक पांवड्यार सर्त करूंक शकतल्या नव्या उद्देगांची घटमूट बुन्याद करप हो आसा. संस्थापकांक मार्गदर्शक, उद्देग तज्ञ आनी गुंतवणुकदारां कडेन जोडून आमी उद्देगाक चालना दिवपी, गुंतवणूक आकर्शीत करपी, उच्च दर्जाच्यो रोजगाराच्यो संदी निर्माण करपी आनी गोंयच्या दीर्घकालीन अर्थीक विकासाक हातभार लावपी परिसंस्था उबी करतात. संवसारीक पांवड्यार सर्त करूंक शकपी स्टार्टअप्स आनी सक्षम नवोपक्रम परिसंस्था तयार करून गोंयाक भारताची क्रिएटिव्ह कॅपिटल करप ही आमची मोख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
