भांगरभूंय | प्रतिनिधी
खबरां संस्था
दुबयः मिचेल स्टार्क आनी पॅट कमिन्स ह्या ऑस्ट्रेलियेच्या फास्ट बॉलरांक इंडियन प्रीमियर लिगाच्या लघु पावणेंत दरेकी 34.75 कोटी आनी 20.50 कोटी रुपयांचे विक्रमी बोली लागल्यो मिचेल स्टार्काक कोलकाता नायट रायडर्स (केकेआर) जाल्यार सनरायजर्स हैदराबादान पॅट कमिन्साक विकतो घेतलो. हर्षल पटेल हे पावणेंत म्हारग भारतीय खेळगडो थारलो. ताका पंजाब किंग्सना 11.75 कोटी रुपयांत विकतो घेतलो.
पोरूंचे पावणेंत इंग्लंडाच्या सॅम करना खातीर मोजल्ल्या 18.50 कोटी रुपयांचो विक्रम मंगळारा दुबय सहज फाटीं पडलो. आयज मेरेन अस्सल अश्टतासी खेळगड्यां खातीर कोटीच्या कोटी मेजताले. ती परंपरा आतां मोडल्या. स्टार्क आनी कमिन्स फास्ट बॉलर आसात आनी गरजे प्रमाण बॅटींग करपाक शकतात. 34 वर्सा पिरायेचो स्टार्क आठ वर्सां उपरांत आयपीएलांत परत खेळटलो. सगले तरेच्या क्रिकेटींत खेळत रावन ताची तंदुरुस्ती आनी वेग हांतूंत कमीपण आयिल्लेंना. ताका चड मोल मेळपाचें घडये हें एक कारण आसपाक शकता. केकेआरान ताजे खातीर 24 कोटी 75 लाख रुपया मेजले. पॅट कमिन्स आतां मेरेनच्या ऑस्ट्रेलियन कॅप्टना परस सामको वेगळो आसा. तो आक्रमक न्हय आनी मैदानार शांत आसता. बॅट्समना कडेन कॅप्टनशीप दिवपाचे ऑस्ट्रेलियन परंपरेतलो तो आडवाद थारता. ताच्या फुडारपणा खाला ऑस्ट्रेलियेन संवसारीक टॅस्ट चॅम्पियनशी, अॅशेस आनी वन-डें संवसारीक वस्तादपण मेळयलां.सनरायजर्स हैदराबादान ताचे खातीर 20 कोटी 50 लाख रुपयांची बोली लायली.
दुबय जाल्ले लघु पावणेंत आतां मेरेन 21 खेळगड्यांक विकतें घेतलां. तांतून 14 विदेशी आनी 7 भारतीय खेळगड्यांचो आसपाव आसा. 10 पंगडांनी आतां मेरेन 56 खेळग्यांची सुवात रिकामी आसा. गुजराता कडेन सद्या 31.85 कोटी रुपयांची पर्स आसा. कोलकाता नायट रायडर्सांत सात सुवातो रिकाम्यो आसात आनी ताचें कडेन फकत 6.95 कोटी रुयये आसात. न्यूझिलंडाच्या डेरील मिचेलान चेन्नय सुपर किंग्जान 14 कोटी रुपयांत आपल्या पंगडांत घेतला जाल्यार रचिन रवींद्राक फकत 1.80 कोटीचें मोल मेळ्ळें. श्रीलंकेच्या वनिंदू हसरंगाक 1.50 कोटी रुपयांक हैदराबादान पंगडांत घेतलो. ऑस्ट्रेलियो स्टीव स्मिथ आनी न्यूझिलंडाचो लॉकी फर्ग्यूसनाक कोणेय विकतें घेतलें ना.
मिचेल स्टार्का खातीर मुंबय इंडियन्स, दिल्ली कॅपिटल्स हांचे मदीं सुरवेक सर्त लागल्ली. मागीर तातूंत केकेआर आनी गुजरात टायटन्स आयले पूण केकेआरान बाजी मारली. कमिन्साची मूऴ मोल दोन कोटी रुपया आशिल्लें. मुंबय इंडियन्स आनी चैन्नय मदीं पावणी सर्त लागली. चैन्नयन 10 कोटी मेरेन पावणी लायिल्ली जाल्यार रॉयल चलेंजर्स बंगळुरून 20.25 कोटीची बोली लायली मात ताका हैदराबादान 20.50 कोटींक विकतो घेतलो. स्लोअर बॉल स्पेशलिस्ट हर्षल पटेलाक विकतो घेवपा खातीर गुजरात टायटन्स, पंजाब आनी लखनौ सुपरजायंटहाचें मदीं पावणी सर्त लागल्ली. निमाणे पंजाबान ताका 11.75 कोटी रुपयांत विकतो घेतलो. हे पावणेंत हर्षल सगल्यांत म्हारग भारतीय खेळगडो थारलो. वेस्ट इंडिजाचो फास्ट बॉलर अल्जारी जसेफाक बंगळुरून 11.50 कोटी रुपयांक विकतो घेतलो. लखनौ सुपरजायंटान ताचे खातीर 10 कोटी मेरेन बोली लायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
