स्कुलांनी रस्तो सुरक्षा सप्तक मनोवचें: शैलेश झिंगडे

भांगरभूंय | प्रतिनिधी

पणजीः गोंयच्या सगल्या स्कुलांनी 14 ते 20 ऑक्टोबर मजगतीं 13 वें रस्तो सुरक्षा सप्तक मनयतले. ‘रस्तो सुरक्षेचो नायक जायात’ ह्या थीम खाला वेगळेवेगळे उपक्रम शिक्षक आनी विद्यार्थी हातांत घेतले अशी म्हायती शिक्षण संचालक शैलेश झिंगडे हांणी परिपत्रका वरवीं दिल्या.
शुक्रारा सकाळीं हे विशींचें शिक्षण खात्यान परिपत्रक जारी केलां. पुराय राज्यांत 14 ते 20 ऑक्टोबर रस्तो सुरक्षा सप्तक मनयतले आनी ते फाटभुंयेर पुराय सप्तकभर स्कुलांनी रस्तो सुरक्षे विशींचे उपक्रम आयोजीत करचे अशें परिपत्रकांत म्हणलां.
भुरग्यां मदीं रस्तो सुरक्षे विशीं एक जापसालदारकीची समज घालपा खातीर दरेक स्कुलांनी रस्तो सुरक्षा प्रतिज्ञा घेवपाचो सुवाळो घडोवन हाडचो. रस्तो सुरक्षेच्या विवीध यंत्रणे वरवीं विद्यार्थ्यांक शिक्षीत करपा खातीर येरादारी खात्या वांगडा स्कुलांनी रस्तो सुरक्षा जागृताय मोहीम घडोवन हाडची.
आल्तीन हांगासर स्मार्ट सिटीचे इंटेलिजेंट येरादारी वेवस्थापन यंत्रणेक भेट दिवपाची कार्यावळ स्कुलांनी घडोवन हाडची आनी अधिकारी कशे तरेन नेम हाताळटात हाचें प्रत्याक्षीत दाखोवचें. परवानगे खातीर येरादारी खात्याचे उपसंचालक सेड्रीक कोर्डेरो (मोबाः 9822161610) हांचे कडेन संपर्क सादचो.
विद्यार्थी आनी लोकां मदीं जागृताय करपा खातीर शिक्षण संचालनालयान येरादारी खात्याच्या जोड पालवान म्हाल पांवड्यार रस्तो सुरक्षा प्रदर्शन घडोवन हाडटले. 9 ऑक्टोबर 2014 ह्या दिसा ही सर्त घडोवन हाडपा खातीर म्हालांतल्या दरेक भाग शिक्षण अधिकार्‍यांची जापसालदारकी आसतली. सर्तीचें थळ, परिक्षक आनी खात्या कडेन निकाल धाडप हे भाग शिक्षण अधिकार्‍यान पळोवचे. 14 ऑक्टोबर 2024 ह्या दिसा पणजे डॉन बॉस्को हायस्कुलांत जावपी प्रदर्शनांत म्हाल पांवड्यार जिखपी पयल्या तीन स्कुलांनी आपल्यो वस्तू प्रदर्शनांत मांडप सक्तीचें आसा.
दरेक स्कुलांनी रस्तो सुरक्षेचेर प्रदर्शन वस्तू 9 ऑक्टोबर पयलीं पुराय करच्यो. आपल्या प्रदर्शनाचें प्रात्यक्षीक दाखोवन तांचे कार्य समजावन सांगचें. फक्त एका स्कुलांतल्यान एकच प्रदर्शन वस्तू स्विकारतले. पणजे जावपी प्रदर्शनाक फक्त 2 विद्यार्थी आनी तांचे बरोबर एका शिक्षकान येवचें. ते निमतान कसले उपक्रम हातांत घेतल्यात हाचे चार फोटे 31 ऑक्टोबर 2024 पयलीं धाडचे, अशें शिक्षण संचालक शैलेश झिंगडे हांणी परिपत्रका वरवीं कळीत केलां.