भांगरभूंय | प्रतिनिधी
बायणाच्या स्कुलांत चोरी करतना थळाव्यांच्या आदारान धरले
वास्कोः बायणाच्या अवर लेडी ऑफ कांदेलारिया स्कुलांत शेनवारा राती चोरी करपाच्या यत्नांत आशिल्ल्या दोगां दुबावितांक वास्को पुलिसांनी थळाव्या लोकांचे मजतीन धरले.
धरिल्ल्या दुबाविता मदीं जाहीद सिरान (32. रा. उडपी कर्नाटक), मौलानी सत्तार जमादार (28. रा. दाडेली कर्नाटक) हांचो आस्पाव आसा. हे आदीं तांकां कर्नाटक पुलिसांनी अटक केल्ली. मुरगांव म्हालांत फाटल्या म्हयन्याभरांत तीन विद्यालयांवनी चोरयो जाल्यात. तातूंत ह्या दोगांचो आस्पाव आसा. तांचो एक सांगाती विजय शेट्टी हाका वास्को पुलीस सोदतात. गोंयांत ज्या विद्यालयांनी चोरयो जाल्ल्यो, तातूंत ह्या दुबावितांचो हात आशिल्ल्याचें पुलिसांनी सांगलें.
बायणांतल्या अवर लेडी ऑफ कांदेलारिया स्कुलांत चोरी करपा खातीर सिरान आनी जमादार शेनवारा रातच्या 11 वरांच्या सुमारा भितर घुशिल्ले. तांणी मुख्याध्यापिकेचें कॅबीन फोडपाचो यत्न केलो, तेन्ना थंय आशिल्ल्या सीसीटीव्ही कॅमेऱ्यांत तांच्यो हालचाली चित्रीत जावन हे संबंदीचें मुख्याध्यापिकेक तिच्या मोबायल फोनाचेर नोटिफिकेशन गेलें.
कॅबिनांत दोग जाण घुशिल्ल्याचें दिसताच मुख्याध्यापिकेन चर्चीचे फादर, कारकून तशेंच हेरांत म्हायती दिली. वास्को पुलिशेक ही म्हायती दिताच पुलीस थंय पावले. भितर घुशिल्ल्या चोरांचो सोद घेवपाचो तांणी यत्न केलो. पूण भितर काळोख आशिल्ल्यान पुलिसांक मात्सो त्रास जालो, पूण पुलिसांक पळोवन त्या चोरांनी थंय लिपपाचो यत्न केलो. तरी लेगीत ते पुलिसांक सांपडले. तांकां धरपाक गेले तेन्ना पुलिसां कडेन झटापट करून थंयच्यान पळून वचपाचो यत्न केलो. पूण अखेर पुलिसांनी तांकां ताब्यांत घेतले.
चवकशे उपरांत दुबावितांनी साबार वाठारांनी चोरयो केल्ल्याचें मानून घेतलें. तशेंच आनीक एक सांगाती विजय शेट्टी हांचीय पुलिशेक म्हायती दिली.
चोरी प्रकरणांत बंदखणींत आसतना त्या तिगांची वळख जाली आनी तांणी आपली टोळी घडयली. हे आदीं मांगोरहिलच्या सेंट टेरेझा हायस्कुलांत चोरी केले उपरांत ह्या चोरांनी एक लाख रुपया चोरले तशेंच 30 हजारांचो डीव्हीआर आपल्या वांगडा व्हेल्ले. ते उपरांत वेळसांवच्या इंफंट जेझूस अकादमी विद्यालयांत चोरी करतना लेगीत ह्या चोरांनी सीसीटीव्हीचो डीव्हीआर आपल्या वांगडा व्हेल्लो. हे चोरये उपरांत आल्त दाबोळीच्या केशव स्मृती माध्यमीक आनी उच्च माध्यमीक विद्यालयांत चोरी करून सुमार 50 हजार रुपया फारायिल्ले. वास्कोचे पुलीस निरिक्षक कपील नायक आनी उपअधिक्षक संतोष देसाय हांच्या मार्गदर्शना खाला वास्को पुलिसांनी ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
