भांगरभूंय | प्रतिनिधी
आयपीएल म्हणल्यार इंडियन प्रिमियर लिगेचें हें 17 वें वर्स. सेगीत 17 वर्सां आपली लोकप्रियता तिगोवन दवरपी आयपीएल ही संवसारांतली एकसुरी क्रिकेट लीग आसा. फाटलीं 17 वर्सां फक्त भारतांतलेच न्हय जाल्यार संवसारांतली सगल्यांत चड लोकप्रीय क्रिकेट लीग म्हणून आयपीएला कडेन पळयतात. संसवसारांतले खूबशे नामनेचे खेळगडे हे लिगेंत वांटो घेतात. मुळांतूच क्रिकेटीक एका धर्मा प्रमाण स्थान आशिल्ल्या भारतांत आयपीएल सुरू आशिल्ल्यान वांटेकार जाल्ल्या पंगडाचे फॅन फॉलोअर्सांची संख्या लेगीत खूब मोटी आसा. आपल्या आवडट्या पंगडाक सपोर्ट करपा खातीर फॅन मैदानार गर्दी करतना दिसतात. आयपीएलाची मॅच खंयच्याय मैदानार, खंयच्याय शारांत आसूं, क्रिकेट रसिकांच्या सुमारा भायर प्रतिसादाक लागून मैदानां भरत आशिल्ल्याचें चित्र आमी दरवर्सा पळयतात. पूण ह्या वर्सा मैदाना बरोबरूच मैदाना भायर लेगीत आपल्या आवडट्या पंगडाक सपोर्ट करपा खातीर चाहत्यां मदीं सर्त लागल्या.
आयचें यूग सोशल मिडियाचें यूग आसा. सोशल मिडियाचो वापर न करपी क्रिकेट चाहतो सोदून लेगीत सांपडचो ना. आयपीएलांत वांटेकार आशिल्ले सगले म्हणल्यार धावूय पंगडाचे स्वतंत्र ट्विटर अकावंट आसात. दरेक पंगडाक ट्विटर फॉलो करपी लाखांनी फॉलोअर्स आसात. हे फॉलोअर्स ट्विट करून आपल्या आवडट्या पंगडाक सपोर्ट करीत आसतात. आयपीएलाची मॅच चालू आसतना ट्विटर्साचो अक्षरशा पावस पडटा. सेकंदाक हजारांनी ट्विट्स येत आसतात. जे ते आपल्या पंगडाक सपोर्ट करपा खातीर ट्विट करीत आसतात. ह्या सगल्यां मदीं मुंबय इंडियन्साचे फॅन फॉलोअर्स सगल्यांत चड आसात. ट्विटर प्रमाणूच व्हॉट्सअॅप, फेसबूक, इन्स्टाग्रामाचेर लेगीत चाहते आपल्या पंगडाक सपोर्ट करीत आसतात. आपल्या आवडट्या पंगडाची मॅच आसत जालयार चाहते आपल्या पंगडाक सपोर्ट करपा खातीर व्हॉट्सअॅपार स्टेटस दवरतात.
सद्या सोशल मिडियाचें चित्र पळयत जाल्यार मुंबय इंडियन्स, चेन्नय सुपर किंग्स आनी आरसीबी ह्या तीन पंगडांक सोशल मिडियाचेर चाहत्यांचो सगल्यांत चड सपोर्ट मेळटना दिसून येता. खेळगड्यां मदीं सगल्यांत चड सपोर्ट चेन्नई सुपर किंग्साचो मुखेली महेंद्र सिंग धोनी हाका मेळत आसा. आंतरराष्ट्रीय क्रिकेटींतल्यान निवृत्त जालो तरी महेंद्र सिंग धोनीची लोकप्रियता अजुनूय उणी जाल्ली ना. उरफाटी ती वाडतूच आसा, हें सोशल मिडिया वेल्यान लक्षांत येता. मुंबय इंडियन पंगडा बरोबर चेन्नयचे मॅचींत धोनीचो खेळ सवायदोन कोटी लोकांनी जिओ टीव्हीचेर ऑनलायन पळयलो. जिओ टीव्हीचेर सगल्यांत चड व्हीव ते मॅचीक मेळ्ळे हो एक विश्वविक्रमूच आसा. फेसबूक, व्हॉट्सअॅपाचेर मॅच कोण जिखतलो हे विशीं चाहत्यां मदीं पैजो लागतात. मॅच सोंपले उपरांत मॅचीचेर आदारीत तशेंच प्रतिस्पर्धी खेळगड्यांची धजा उडोवपी मजेशीर मिम्स तयार करून व्हायरल करतात. हातूंतल्यान मनरिजवण तर जाताच. पूण पंगडाची सद्याची स्थिती कितें आसा हें लेगीत समजता.
आपल्या पंगडान बरी कामगिरी केली वा पंगड जैतिवंत जालो जाल्यार पंगडांतले खेळगडे आनी प्रशिक्षक खोशी आसतात. पूण कोलकाता नायट रायडर्स पंगडाचो प्रशिक्षक गौतम गंभीर हो पंगडान बरी कामगिरी केली वा पंगड जिखलो तरी तो गंभीर आसता. ताचेर गौतम गंभीराची धजा उडोवपी खूबशे मिम्स सोशल मिडियाचेर धुमशेण कांडीत आसात. मुंबयचो पंगड सद्या हार घेत आसा. सेगीत तीन मॅचींनी हार घेतिल्ल्यान मुंबय पंगड नोटिझन्साच्या निशाण्यार आयला आनी पंगडाची सोशल मिडियाचेर बरीच टिका जायत आसा. मुंबय पंगडाचो मुखेली हार्दीक पांड्या हो तर नोटिझन्साचो हॉट फेवरेट ‘बोकडो’ थारला. मुखेली जाले उपरांत पयलेच मॅचींत ताणें रोहीत शर्माक बावन्ड्रीचेर फिल्डींग करपाक धाडिल्ल्यान क्रिकेट मोगी ताचेर तिडकल्यात. हार्दीक पांड्याचे हे कृतीक लागून प्रेक्षकांनी मैदानार जाल्यार ताची धजा उडयलीच पूण मैदाना भायर ताका सुमारा भायर ट्रॉल केलो. हार्दीक पांड्याक ट्रोल करपी मिम्साचो सोशल मिडियाचेर अक्षरशा पावस पडटा. नोटिझन्स सोशल मिडियाचेर मजेशीर मिम्स, मॅसेस करीत आपल्या पंगडाक सपोर्ट करतनाच प्रतिस्पर्धी पंगडाची धजा उडोवन फॅन आयपीएलाचो फिव्हर आनीक वाडयत आसात. एकूणच फक्त मैदानारूच न्हय, सोशल मिडियाचेर लेगीत आयपीएलाचो फिव्हर वाडिल्ल्याचें दिसून येता.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
