भांगरभूंय | प्रतिनिधी
म्हापशें, प्रतिनिधी ः फाटल्या दोन वर्सां सावन म्हापशें अबकारी खात्याचें कार्यालय आशिल्ली खाजगी इमारतीची लिफ्ट फाटल्या दोन वर्सां सावन बंद आसा. अकबारी कार्यालय पांचवे माळयेर आशिल्ल्यान थंय वचपाक शंबर पायर्यो चडच्यो पडटात. ताका लागून वेवसायिकांनी तिडक उक्तावन ही लिफ्ट बेगीन सुरू करपाची मागणी केल्या.
मरड-म्हापशेंच्या कॉस्मॉस सेंटर हे इमारतीचे पांचवे माळयेर अबकारी खात्याच्या बार्देस निरीक्षकांचें कार्यालय आसा. बार्देस म्हालांतलीं बार्रां, वायन स्टोअरांचे धनी आनी रेस्टॉरन्ट वेवसायीक आपले गरजेचे परवाने मेळोवपा खातीर ह्या कार्यालयाक भेट दितात. सध्या अर्थीक वर्साच निमाणे कांय दिस उरिल्ल्यान वेवसायीक व्हडा प्रमाणांत ह्या कार्यालयांत यो-वच करतात.
मार्च एण्ड आशिल्ल्यान बार्देसांतल्या सोरो वेवसायिकांक ह्या कार्यालयांत पर्वानो नुतनीकरण करपाक येवचें पडटा. मात लिफ्ट बंद आशिल्ल्यान तांची गैर वेवस्था जाता. अकबारी खात्यान ह्या कार्यालयाच्या जाग्याचें भाडेपट्टी करारपत्र नुतनीकरण करूंक ना. तशेंच उरिल्ल्या भाड्याची किंमत दिवंक नाशिल्ल्यान दोन वर्सां आदीं मार्च ऍण्डाकूच ही लिफ्ट बंद केल्ली. ती आजूनय बंदूच आसा.
इमारतीची लिफ्ट बंद आशिल्ल्यान लोकांक पांचवे माळयेर वचपा खातीर १०० पायर्यो चडच्यो आनी देंवच्यो पडटात. हांगच्यो दोनूय लिफ्टी सद्या बंद आसात. हाचो परिणाम म्हळ्यार सोर्याच्या वेवसायिकांक गरजेच्या कामा खातीर ह्यो पायर्यो चडून पांचवे माळयेर वयचें पडटा. ज्येश्ठ नागरिकांक ह्या कार्यालया मेरेन पावपाक बरेच त्रास सोंसचे पडटात.
सरकारान हें कार्यालय हेर खंयसरूय स्थलांतरीत करचें, अशी मागणी वेवसायीक सुशांत साळगांवकार हांणी केली.
मजगतीं, गोवा कॅन हे संस्थेन ही लिफ्ट रोखडीच सुरू करपा संबंदी राज्याचे मुखेल सचीव, वित्त खात्याचे सचीव, गिरायक प्राधिकरणाचे सचीव, उत्तर गोंय जिल्होधिकारी, बार्देस, उपजिल्होधिकारी अबकारी खात्याचे आयुक्त, भौशीक बांदकाम खात्याचे प्रधान अभियंते, उजो पालोवपी दळ आनी नागरी पुरवण खातें हांकां निवेदन सादर केलां.
ते प्रमाण दिव्यांग व्यक्ती हक्क कायदो आनी हेर कायद्यांची कारवाय जावची न्हय देखून ही लिफ्ट बेगीन सुरू करपाचे निर्देश उपजिल्होधिकारी उदय प्रभू देसाय हांणी सहकार खात्याचे उपनिबंधक, म्हापशें आनी अबकारी निरिक्षक म्हापशें हांकां दिल्या.
मजगतीं, अकबरी खात्यान अंमलबजावणी केल्ल्या कॉस्मॉस सेंटर इमारतींतल्या ह्या कार्यालय जाग्याचें कंत्राटाचें नूतनीकरण फाटलीं दोन वर्सां सावन प्रलंबीत आसा. ताका लागून जाग्याच्या धनया कडेन ही लिफ्ट मुद्दम बंद दवरल्या. हे इमारतींत युनिटधारकांची सोसायटी आसा. इमारतीची आनी लिफ्टची दुरूस्ती करपाची जापसालदारकी हे सोसायटीची जावन आसा. तरीय ही लिफ्ट बंद दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
