भांगरभूंय | प्रतिनिधी
अपघातांत एके बायले सयत दोग जाण जखमी
पणजी: शुक्रारा 20 वेर सकाळीं पोरण्या मांडवी पुलार ओव्हरटेक करपाच्या यत्नांत सोरो पियेल्लो बलेनो मोटार चालकान तीन दुचाकीक धपको दिलो. ह्या अपघातांत एके बायले सयत दोग जाण जखमी जाले. ह्या अपघाताक लागून येरादारी नव्या पुला वेल्यान घुंवडायिल्ल्यान पणजी तशेंच पर्वरी वाठारांत सुमार एक वर येरादारीची कोंयडी जाली. मजगतीं ह्या प्रकरणांत पणजी पुलिसांनी मोटार चालकाक ताब्यांत घेतला.
पणजी पुलिसांनी दिल्ले म्हायती प्रमाण शुक्रारा 20 वेर सकाळीं 9.30 वरांच्या सुमाराक पोरण्या मांडवी पुलार सोरो पियेल्लो चालक चलयत आशिल्ली बलेनो मोटार दुसर्या वाहनांक ओव्हरटेक करपाच्या यत्नांत आपली दिशा सोडून मुखा वेल्यान येवपी तीन दुचाकींक नेटाचो धपको दिलो. हातूंत एके बायले सयत दोग जाण गंभीर जखमी जाले. तांकां रोखडेंच बांबोळे गोंय वैजकी म्हाविद्यालयाच्या हॉस्पिटलांत दाखल केले. थंय तांचेर उपचार सुरू आसात.
अपघात जाले उपरांत सोरो पियेल्ल्या चालकाक लोकांनी मारपेट केल्ल्याची म्हायती मुखार आयल्या. ह्या अपघाताची म्हायती मेळटकच पणजी पुलीस आनी येरादारी पुलिसांनी धांव घेतली. उपरांत रोखडोच पोरणो मांडवी पूल येरादारी खातीर बंद दवरलो. उपरांत येरादारी नव्या पुला वेल्यान घुंवडायली. ताका लागून सुमार एक वर पणजी आनी पर्वरी वटेन येरादारीची कोंयडी जाली. सकाळीं कामांक वचपी नागरिकांक अचकीत जाल्ल्या अपघाताक लागून आनी अचकीत येरादारी घुंवडायिल्ल्यान गरजे भायर त्रास सोंसचे पडले.
ह्या अपघाताची म्हायती मेळ्ळे उपरांत पुलीस निरिक्षक विजयकुमार चोडणकार हांच्या मार्गदर्शना खाला हवालदार गोविंद गांवस हांणी पंचनामो केलो. तशेंच सोरो पियेल्ल्या चालकाची वैजकी चांचणी करून ताका ताब्यांत घेतला.
मजगतीं, फुडलो तपास सुरू केला. हे विशीं रातीं उसरां मेरेन जखमीची जबानी घेवपाक मेळूंक नाशिल्ल्यान गुन्यांव दाखल जाल्लो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
