भांगरभूंय | प्रतिनिधी
मडगांव, प्रतिनिधी : सोनसडो प्रकल्पाच्या शेडी भितरलो कोयर भायर काडला. मात, उजो लागपाच्यो घडणुको चालूच आसात. लोक रावपी इमारतींच्या कुशीक सांठयिल्ल्या कोयराक रातचो परत उजो लागिल्ल्याची घडणूक घडली. तीन गाडयांच्या उदकाचो वापर करून साडे तीन वरांनी वेर्णे, मडगांवच्या उजो पालोवपी दळान उजो नियंत्रणांत हाडलो.
सोनसडो प्रकल्पांतलो कोयराचो प्रस्न सुटूंक ना. हांगा सांठोवन दवरिल्ले कोयराचे रांशीक आयतारा रातचें सुमार १ वरांचेर परत एक फावट उजो लागलो. सोनसडो शेडी लागसारा आशिल्ल्या सुरक्षा रक्षकांक उजो दिसतांच तांणी उजो पालोवपी दळाच्या कार्यालयाक म्हायती दिली. मात, मडगांव उजो पालोवपी दळाची गाडी दुसरे कडेन गेल्ल्यान वेर्णाच्या उजो पालोवपी दळाचे गाडयेक सांगलें. वेर्णा सावन आयिल्ले गाडयेंतल्यान उदक मारून लेगीत उजो पालव नाशिल्लो. तो मेरेन मडगांव उजो पालोवपी दळाची गाडी आयली आनी तांणी उदक मारलें. मडगांव उजो पालोवपी दळाच्या दोन गाडयांनी उदक मारले उपरांत उजो नियंत्रणांत आयलो. हो उजो धुंवर येवन येवन परत पेट्टालो. ताका लागून तो पुरायेन पालोवपा खातीर ३ वरां यत्न करचे पडले.
न्यायालयांतल्या सुनावणे वेळार उजो पालोवपी दळाचीं यंत्रणां सोनसडो हांगा बसोवपाच्यो सुचवण्यो न्यायालयान केल्या. शेडींतलो कोयर सुकपा खातीर आनी सिमेंट कंपन्यांक धाडपा खातीर प्रकल्पाच्या वाठारांत दवरला. हो उजो वेळार नियंत्रणांत आयिल्ल्यान भोंवतणच्या वाठारांत पातळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
