भांगरभूंय | प्रतिनिधी
भांगरभूंय । खबरां मेज
पणजीः बनारसी पान आनी गुलाबाचें अत्तर तयार करपाक जी प्रक्रिया लागता तशीच प्रक्रिया लेखकांनी आपणावन लोकांक आपल्या साहित्यांतल्यान खोस दिवपाक जाय अशें नामनेचे साहित्यीक दत्ता दामोदर नायक हांणी सांगलें. मंगळुरांत जाल्ले विश्व कोंकणी केंद्रांत, ’मायकल डिसोझा व्हिजन कोंकणी पुसतक प्रकाशन’ येवजणेच्या उक्तावण सुवाळ्याक ते उलताले. ह्या सुवाळ्यांक सी.ए. नंदगोपाल शेणै, नामनेचे कवी मॅल्वीन रॉड्रिगीस, टायटस नोरोन्हा, एच एम पर्नाल, विश्व कोंकणी केंद्राचे विश्वस्थ मंडळी विलियम डी सोजा, कस्तूरी मोहन पै, बी. आर. भट आनी डॉ बी. देवदास पै आनी हेर मानेस्त हजर आशिल्ले.
दत्ता नायक हांणी साहित्याच्या विंगड विंगड तासां विशीं उलयतना, साहित्य हें लोकांक सोंपेपणान समजुवपी आनी आनंद दिवपी आसूंक जाय अशें म्हणलें.
‘‘२५ मिलीलिटर गुलाबाचें अत्तर करपाक १०० किलो गुलाबाच्यो पाकळ्यो लागतात. तशेंच २५ पानां बरयतलो जाल्यार, साहित्यिकाक कितल्याशाच पानांचें वाचन जाय पडटा. बरो लेखक हो पयलीं बरो वाचपी आसपाक जाय. चिंतत, मनन आनी प्रवासूय जाय,‘’ अशें नायक हांणी म्हणलें. तांच्या म्हणण्या प्रमाण साहित्य बरयतना खोल अभ्यास आसपाक जाय. तशेंच प्रवास वर्णन बरयतना, तीं आपूण भोंवता ते सुवाते वयल्यानच बरोवंक जायना, तर तांचो उगडास करून आनी ताचेर अभ्यास करून बरोवप गरजेचें अशें तांणी म्हणलें.
‘गुलाबकंद, खोबऱ्याचो कीस आनी हेर साहित्य घालून जशें बनारसी पान तयार जाता तशेंच आमचें साहित्य आसपाक जाय. साहित्य बरयतना भाशा कठीण आसपाक जायना. ती सोंपे तरेन लोकांक समजतली तशी बरोवंक जाय. रवींद्रबाब केळेकार हांच्या सारकें ल्हान ल्हान वाक्य बरोवन साहित्य निर्मणी करपाक जाय,‘‘ अशें तांणी मुखार म्हणलें. भुरग्यां खातीर सोंपें बरोवचें. पूण सोंपें बरोवप खूब कठीण आसता. ताचेर भर दिवंक जाय,अशें तांणी सांगलें
विश्व कोंकणी केंद्राचे अध्यक्ष सी.ए. नंदगोपाल शेणै हांणी आपल्या अध्यक्षपण भाषणांत म्हणलें “कोंकणी साहित्याक उर्बा दिवपाक आनी कोंकणी भाशेची सेवा करपाचो विश्व कोंकणी केंद्राचो मुखेल हेत आसा,‘’ हे येवजेण खाला सुमार १०० पुस्तकां उजवाडाक हाडटले अशी म्हायती तांणे दिली.
विश्व कोंकणी केंद्राचे उपाध्यक्ष गिलबर्ट डिसोझान उपकार मानले आनी सुचित्रा एस. शेणै हांणी सूत्रसंचालन केलें. टायटस नोरोन्हा हांणी हे येवजणेची म्हायती दिली आनी मेल्वीन रॉड्रिगीस हांणी ज्या 21 लेखकांक ही येवजण मेळ्ळ्या तांच्या हातबरपाची म्हायती दिली.
विश्व कोंकणी केंद्राचे संस्थापक बसती वामन शेणै हांगेले प्रतिमाक फुलां हार घालनू कार्यावळीक सुरवात जाली. एच एम पेर्नाल हांच्या अध्यक्षपणा खाला “पुस्तक पंचातीक” ह्या विशयाचेर संवाद जालो. लेखिका शकुंतला आर. किणी, एड्डी सिकवेरा हांणी लेखकां वतीन आनी पय्यन्नूरू रमेश पै आनी संत अलोशियस प्रकाशनाचे निर्देशकी डॉ विद्या विनूत डिसोज हांणी प्रकाशकां वतीन आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
