भांगरभूंय | प्रतिनिधी
पणजेच्या मळ्यांतल्या नुस्तें मरपाचे घडणुकी उपरांत आतां कांपाला वयल्या लेक व्ह्यू काॅलनी लागसारच्या तळ्यांतूय मेल्लें नुस्तें सांपडलां. मेल्लें नुस्तें दिसता खरें, पूण ताचे फाटल्यान कणा- कणान मरत आसता, ती पुराय उदकांतली जीण. हातूंत फक्त नुस्तेंच न्हय, तर वनस्पत आनी हेर जिवूय आस्पावतात. ही सैमान दिल्ली शिटकावणी. तिचे कडेन आडनदर करप म्हणल्यार संकश्टाक आपोवणें. सैमाचो सत्यानाश जावपाक (करपाक) कांय दीस, म्हयने लागतात, मात ताचे परिणाम 3- 4 पिळग्यांक भोगचेच पडटात. तेन्ना तळीं वाटावप म्हणल्यार फक्त उदक आनी सैम न्हय, तर फुडारांतल्यो पिळग्यो वांटावप, हें आमी घट मतींत दवरूंक जाय. मळो आनी कांपालाच्या तळ्यांनी ह्या दोन घडणुकां वरवीं शिटकावणी दिल्या. सैमवाद्यांनी हुस्को उक्तायला. सामान्य भौस चुरचुरला. मात, खरी पावलां उखलपाक जाय तीं म्हापालिकेन. फक्त अहवाल तयार केलो आनी तो सोबीत फायलींत धांपून वयर घट्ट तांबडो दोरो बांदलो म्हूण कांय जावचें ना. दोऱ्याची गांठ सोडोवन भितरल्यो सुचोवण्यो चालीक लायतले, तेन्नाच समस्या सुटावी जातली.
मळ्यांतल्या तळ्यांत घाणयारें उदक मिस्तुराद जाल्ल्यान आॅक्सिजनाचें प्रमाण देंवलें आनी नुस्तें मेलें असो निश्कर्श पणजी म्हापालिकेच्या फाटल्या अहवालांत काडिल्लो. कांपालार वेगळें कितें कारण आसत. सांतिनेज खारीज तर नितळ करपाचे पलतडीं पावलां. फाटल्या 50 वर्सांत ताचेर अब्जांनी रुपया खर्च जाला आसतलो!! एक नगराध्यक्ष पत्रकारांक घेवन भितर बुडपाचोय बी! कितेंय जालें काय दोन दीस बोवाळ करपाचो. मागीर चवकशी समिती नेमली, अहवाल आयलो काय प्रकरण शांत जायसर वाट पळोवपाची. तें रोखडेंच जाता. कारवाय मात जायना. समस्या आशिल्ली तशीच उरता. संबंदीत खात्यांनी आतां शांतपणान बसून हाचेर उपाय काडपाचो वेळ आयला. गटार, संडासाची घाण उदका स्रोतांनी सोडप बंद जालें जाल्यार अर्दी समस्या सुटावी जातली. ते खातीर लोकांक मतदार म्हूण न्हय, तर लोक म्हणून पळोवचें पडटलें.
फक्त तळींच न्हय, तर न्हंयो, व्हाळ पसून बुरशे करूंक जायनात. घाणयाऱ्या उदकाचेर प्रक्रिया केले बगर तें खंयच सोडप धोक्याचें. कोयर, प्लास्टीक, रसायनां, निर्माल्य कांयच उदकांत सोडपाक जायना. प्रदुशणाचो दुबाव आसल्यार उदकाची तपासणी जावंक जाय. रासायनीक सारीं, कीडनाशकां चड वापरूंक फावना. कारण पावसाच्या उदका वांगडां हें सगलें उदका स्रोतांत पावता. अतिक्रमणां काडपाक जाय. दोंगर सोंपचे पयलीं थंय पावसाचें उदक जिरोवपाक जाय. साबार राज्यांनी ही पद्दत वापरतात. ताका लागून गिमाच्या दिसांनी बांयचें उदक आटना. नागरिकांनी नितळसाण मोहिमो चालीक लावच्यो. नुस्तें मरप हें फक्त नुस्त्यां पुरतें मर्यादीत ना. तर उदकाचे भलायकेचो तो प्रस्न. हें उदक जमनींत झिरपता, हें आमच्या केन्ना लक्षांत येतलें?
नुस्तें स्वास घेवपाक उदकांत विरगळिल्ल्या आॅक्सिजनाचेर अवलंबून आसता. घाणयारें उदक, कोयराक लागून आॅक्सिजनाचेर परिणाम जाता. प्रदुशण तें कित्याक लागून जाता, हें सगल्यांक खबर आसा. उदकांत नायट्रोजन, फाॅस्फरस वाडल्यार पाचवो शेळो येता. तो दिसाचो आॅक्सिजन तयार करता, पूण रातचो चड आॅक्सिजन वापरता. म्हणटकच नुस्त्यांचेर परिणाम. खर वताक लागून आॅक्सिजन कमी जाता. उदकांतले रोग, विशाणूय नुस्त्यांचेर मारक थारतात. मळो आनी कांपालाच्या उदकाची परतून एक फावट तपासणी करची पडटली. तेन्नाच नेमकें कितें जालां तें कळटलें.
पावसाचो येलो, रेड अलर्ट आसता. नुस्त्यांचें मरप हो पर्यावरणाचो रेड अलर्ट समजुचो आनी ताचो तळ्या कडेन संबंद आशिल्लीं सुकणीं, कांसव, गोरवां, वनस्पत आनी निमणो मनीस हांचेर परिणाम जावचे पयलीं उपाय घेवचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
