भांगरभूंय | प्रतिनिधी
फादर रॉबर्ट फर्नांडीसः वाळपय अवर लेडी उच्च माध्यमिकांत मनयलो पर्यावरण दीस
भांगरभूंय । प्रतिनिधी
वाळपयः विद्यार्थ्यांनी सैमा कडेन इश्टागतीचें नातें निर्माण करपाची गरज आसा. ते खातीर विवीध उपक्रमांच्या माध्यमांतल्यान विद्यार्थ्यांक सैमा विशीं गोडी निर्माण करप गरजेचें आसा. अशा उपक्रमांच्या माध्यमांतल्यान ही गोडी निर्माण जाता, अशें वाळपयच्या अवर लेडी ऑफ लुर्डस् उच्च माध्यमीक हायस्कुलाचे फादर रॉबर्ट फर्नांडीस हांणी सांगलें.
उच्च माध्यमिका वतीन पर्यवरण दीस मनयलो. ह्या वेळार विद्यार्थ्यां खातीर वेगवेगळे उपक्रम आयोजीत केल्ले. ह्या वेळार फादर फर्नांडीस उलयताले.
पर्यावरण हें दरेकल्याचे जिणे कडेन संबंदीत आसा. पर्यावरण सुरक्षीत उरले जाल्यार मनशाची भलायकी सुरक्षीत उरपाक शकता. नाजाल्यार मनशाचे भलायकेचेर फुडारांत वायट परिणाम जावपाक शकतात, अशें फा. फर्नांडीस हांणी सांगलें.
शाळेच्या पयल्या दिसा प्रार्थना आनी येवकार सुवाळ्या उपरांत विद्यार्थ्यांनी शाळेच्या वाठाराची नितळसाण केली आनी पर्यावरण दिसाचें म्हत्व समजून घेतलें. प्रार्थना सभे वेळार यत्ता बारावेच्या विद्यार्थ्यांनी पर्यावरणाचें म्हत्व, प्लास्टिकाचो दुरुपेग आनी वायट परिणाम, वाडटे तापमान, झाडांचें म्हत्व ह्या विशयांचेर आपले विचार मांडले.
मुख्याध्यापक फादर रॉबर्ट फर्नांडीस हांणी सांगलें, आमी अंदूं प्लास्टीक हटाव हो मंत्र जपुया आनी प्लास्टिकाचो उपेग उणो करुंया. आपली शाळा आनी शाळेचो वाठार नितळ दवरुया. सुमार 100 विद्यार्थ्यांनी ह्या वेळार पर्यावपणा विशीं सोपूत घेतलो. ह्या वेळार उच्च माध्यमिकाची प्राचार्य सुनिता हांणी सांगलें, भुरग्यांनी नेमान पर्यावरणा संबंदांत जागरूक रावप गरजेचें आसा. हालींच्या काळांत नेमान तापमानांत बदल जावपाक लागला. पर्यावरणाचेर जावपी आघातांक लागून तापमानांत परतून परतून बदल जायत आसात. फुडारांत आमकां निरोगी जीण जगपाची आसत जाल्यार पर्यापरणाचो आदर करात. तशेंच व्हड प्रमाणांत झाडांचे रोपें लायात, अशी विनवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
