भांगरभूंय | प्रतिनिधी
दुबावीत रईस खानाची अटकपूर्व जामिना खातीर धांव
म्हापशें: पेन्हा दी फ्रान्स पंचायत वाठारांतल्या सेरुला कोमुनिदादीच्या भुंयखंडाची बनावट कागदपत्रां तयार करून सदर 5700 चौरस मिटर भुंयखंड हडप केल्ल्या प्रकरणांत पर्वरी पुलिसांनी दुबावीत आरोपी रईस अहमद खान (करंजाळे, पणजी) आनी हेरां आड गुन्यांव नोंद केला.
ही बनावटगिरी करून जमीन हडप करपाचो प्रकार फाटल्या ऑगस्ट 2005 पयलीं घडिल्लो. ह्या प्रकरणांत उत्तर गोंय कोमुनिदाद प्रशासक सागर गावडे हांणी कागाळ केल्या.
दुबावीत आरोपींनी दोना पावला हांगासरल्या नारायण ज्योस डायस आनी तांची घरकान्न हांच्या नांवान सेरुला कोमुनिदीदच्या सर्वे क्रमांक बनावट 188/0 मदली 5700 चौरस मिटर भुंयखंडाची बनावट कागदपत्रां तयार केलीं.
उपरांत हीं कागदपत्रां विवीध सरकारी अधिकाऱ्यां कडेन खरी म्हणून सादर केली आनी हो भुंयखंड दुबावीत रईस खान हाच्या नांवान हस्तांतरीत करून घेतलो.
ही बनावटगिरी आनी फटवणुकीचो प्रकार नदरेक आयले उपरांत कागाळदार उत्तर गोंय कोमुनिदाद प्रशासकांनी शेनवार 13 एप्रील 2024 दिसा पर्वरी पुलिशेंत रितसर कागाळ दाखल केली.
ते प्रमाण पुलिसांनी दुबावीत रईस खान आनी हेरां आड भा.दं.सं.च्या 465, 468, 471, 420, 120 (ब) आनी 34 कलमा खाला गुन्यांव नोंद केला. फुडलो तपास पुलीस उपनिरिक्षक सिमाराम मळीक करतात.
मजगतीं, दुबावीत आरोपी रईस खान हाणें ह्या गुन्यांवांत आपली अटक चुकोवपा खातीर जिल्हो न्यायालयांत अटकपूर्व जामिना खातीर धांव घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
