भांगरभूंय | प्रतिनिधी
प्रशांत नायक: कोणेय फोन केलो जाल्यार भियेवचो ना आनी फाटींय सरचो ना
कोरगांव: मांद्रें पंचायत वाठारांतली सुवात व्हड प्रमाणांत सेटलमेंट झोनांत रुपांतरीत केल्यात. हे सुवातेंत व्हड प्रमाणांत अतिक्रमण सुरू आसा आनी ताचे आड ग्रामस्थांनी तशेंच पंच वांगड्यांनी लेगीत आवाज उठयला. सरपंच ह्या नात्यान हांव ग्रामस्थांचे वतीन सांखळी उपोशण जाहीर करीत आसून सेटलमेंट झोनांतली रुपांतरीत केल्ली जमीन रद्द जायना तो मेरेन हें उपोशण सुरूच उरतलें अशी शिटकावणी सरपंच प्रशांत नायक हांणी दिल्या.
सरपंच प्रशांत नायक हांणी सांगलें की, गांवाचेर अक्षरशा वकृदृश्टी पातळ्ळ्या आनी ताचे आड आतां मांद्रें ग्रामस्थ एकठांय आयल्यात. आमी सरकारा आड, नगर नियोजन खात्या आड सांखळी उपोशण करतले. ते खातीर हेर पंचायतींतल्या पंच वांगड्यांनी लेगीत आमकां तेंको दिला.
सरपंच नायक हांणी ग्रामस्थांक विनंती केल्या की तारीख जाहीर जाले उपरांत सगल्यांनी आपलो तेंको दिवपा खातीर बांदोडकार गार्डन हांगा एकठांय जावन उपोशाणांत वांटेकार जावचे. सकाळीं उठले उपरांत रस्त्या वेल्यान वता आसतना जेसीबी दिसता. ग्रामस्थ आपल्यो काजी एकठांय करपा खातीर वतात जाल्यार तांकांय बावन्सर आडायतात. अश्यो घडणुको घडच्यो न्हय हे खातीर उपोशण करपाची गरज आसा.
सांखळी उपोशण करतना दिल्ली सावन वा हेर कोणाचोय फोन आयलो जाल्यार त्या फोनाक हांव भियेवचो ना, आनी हें उपोशण जो मेरेन प्रस्न सुटावो जायना तो मेरेन फाटीं घेवचो ना अशी खर शिटकावणी सरपंच प्रशांत नायक हांणी दिली. उदरगती खातीर आमचो विरोध ना. उदरगतीचीं कामां करचे पयलीं आमी ग्रामस्थांक ग्रामसभेंत विचारूनच ताचेर निर्णय घेतले अशें थारलां. दोंगर वाठारांत विकासकामां करपाक आमचो विरोध आसा आनी तो आसतलो अशेंय सरपंच नायक हांणी स्पश्ट केलें.
विभागीय आराखड्या वेळार केंद्रीय मंत्री श्रीपाद नायक हे ओग्गी आशिल्ले आनी अजूनय ते ओगीच आसात. तांकां मांद्रें मतदारसंघांतल्यान मतदान जाय जाल्यार तांणी आपली भुमिका स्पश्ट करची, आनी मांद्रें ग्रामदेवीच्या देवळांत येवन नगर नियोजन विभागान घेतिल्ल्या सेटलमेंटाचो निर्णय रद्द करतलों अशें आस्वासन दिवचें अशें सरपंच नायक हांणी म्हणलें.
सरपंच प्रशांत नायक हांकां जमीन रुपांतरीत जायनाशिल्ल्यान हाका विरोध करपी निवेदन ग्रामस्थांनी मंगळारा सरपंचाक दिलें. ह्या वेळार थळावे सुकाजी नायक, संदेश सावंत आनी हेर ग्रामस्थ हाजीर आशिल्ले.
व्हड प्रमाणांत सुवात रुपांतरीत जायत आसा आनी ती आडावपा खातीर आमी सरपंचाक निवेदन दिलां. सरपंच आमचे बरोबर आसात आनी ते ग्रामस्थां बरोबर रावन ग्रामस्थांक जाय तीच भुमिका घेतले हाची आमकां खात्री आसा. सरपंचान जाहीर केल्ल्या आंदोलनाक आमचो तेंको आसा. जर हे दोंगर वाटायले नात जाल्यार फुडल्या पांच वर्सांत आमच्या भुरग्यांक हे दोंगर पुस्तकांत दाखोवचे पडटले अशें सुकाजी नायक हांणी म्हणलें.
ग्रामस्थ संदेश सावंत हांणी म्हणलें की, सुवातांचे सेटलमेंट हें गोंयकारां खातीर न्हय जाल्यार भायल्या लोकां खातीर जालां. दोंगर, झाडां ही सैमीक संपत्ती आसा. ताका बादा येवंक शकता. जनावरां रावतात थंय जर आयज मनीस रावंक लागले जाल्यार जनावरां खंय रावतलीं? आमच्या जिवाक धोको निर्माण जातलो. सरपंचान घेतिल्ली भुमिका योग्य आसा आनी तांकां आमचो तेंको आसतलो.
ह्या वेळार देवेंद्र पार्सेकार हांणी सरपंचाची भुमिका योग्य आशिल्ल्याचें म्हणलें.
स्वताची जमीन आसत आनी थंय बांदकाम जायत आसत जाल्यार ताका परवानगी घेवची पडटा. दरेक गजालीक कायदो आसा आनी तो दरेकान पाळूंक जाय अशें सरपंच प्रशांत नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
