भांगरभूंय | प्रतिनिधी
गोंय फुटबॉल संघटणेन आयोजीत केल्ले प्रो लीग फुटबॉल सर्तींत पॅक्स ऑफ नागोवा स्पोर्ट्स क्लब आनी सेझा फुटबॉल अकादमीन आपलीआपली मॅच जिखली.
सेझा फुटबॉल अकादमीच्या मैदानाचेर खेळयिल्ले लडतींत येजमान सेझा फुटबॉल अकादमीन वास्को स्पोर्ट्स क्लबाक एका गोलान हारयलो. मॅचीच्या 72व्या मिनटाक जोशुवा डिसिल्वान सेझा फुटबॉल अकादमी वतीन म्हत्वाचो गोल केलो. ह्या जैता सयत सेझा फुटबॉल अकादमीचे 22 मॅचींतल्यान 42 गूण जाल्यात. ताणें 13 मॅची जिखल्यात, जाल्यार स मॅचींनी हार घेतल्या. तीन मॅची बादाबाद उरल्या. सेझा फुटबॉल अकादमीन गुणतकट्यांतली आपली पयली सुवात कायम राखल्या. वास्को स्पोर्ट्स क्लबाचे 22 मॅचींतल्यान 22 गूण आसात.
बाणावलींतल्या साग मैदानाचेर जाल्ले लडतींत पॅक्स ऑफ नागोवा स्पोर्ट्स क्लबान कुठ्ठाळी व्हिलेजर्स क्लबाक 3-1 अशा फरकान हारयलो. पॅक्स ऑफ नागोवा वतीन डॅल्टन कुलासो, शुबर्ट परेरा आनी शर्विन आब्रांचिसान गोल केले, कुठ्ठाळी व्हिलेजर्स क्लबा वतीन एकोडो गोल क्लायव्ह मिंराडान केलो.
पॅक्स ऑफ नागोवाचे 22 मॅचींतल्यान 41 गूण जाल्यात. गुणतकट्यांत तो दुसरे सुवातेर आसा. कुठ्ठाळी व्हिलेजर्साचे 22 मॅचींतल्यान 39 गूण आसात. तो दुसरे सुवाते वयल्यान तिसरे सुवातेर घसरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.