भांगरभूंय | प्रतिनिधी
सांगें, प्रतिनिधी: कृषी खात्यान नाल्लाच्या पिका खातीर दितात तें सेंद्रीय सारें बेगीन दिवचें अशी मागणी बागायतदार आनी शेतकार करतात. फाटल्या वर्सा उसरां सारें दिल्लें. मात अंदूं बेगीन सारें दिवचें अशी मागणी जाता.
सांगें, केपें विभागांत नाल्लांचें उत्पादन करपी शेतकारांक कृषी खात्यान अन्नपूर्णा सेंद्रीय सारें दिल्लें. दरेका विभागा खातीर शंबर हॅक्टर जमनीचें लक्ष्य निश्चीत केल्लें. ताका लागून बर्याच शेतकारांक येवजणेचो लाव मेळूंक ना. दोन वर्सां खातीर अनुदानांत सेंद्रीय सारें वाटपाची येवजण आसा. अंदूंचें दुसरें वर्स आशिल्ल्यान सप्टेंबराचे निमाणे मेरेन सारें वाटूंक ना. तें दिवपाची शेतकार मागणी करतात. तशेंच नव्या शेतकारांक सारें वाटपा खातीर खात्यान बेगीनूच पावलां उबारचीं अशें शेतकारांचें म्हणणें आसा.
सेंद्रीय सार्याचो नाल्लाच्या पिका खातीर बरो फायदो जाल्ल्यान जमिनीची सुपीकता आनी उत्पादन वाडटा. फाटल्या वर्सा फकत १०० हॅक्टर जमनीचें टार्गेट दिल्ल्यान कोटा सोंपला. ताका लागून शेतकारां कडल्यान आयिल्ले अर्ज अजूनय तशेच उरल्यात. फाटल्या वर्सा सेंद्रीय सार्यांचो लाव घेतिल्ले हे शेतकार शेतकरी विभागीय शेती खात्याच्या कार्यालयांत येवन आपल्याक सारें केन्ना मेळटलें काय विचारतना दिसतात.
तशेंच विवीध येवजण्यां खाला शेतकारांक दिवपी झाडां वेळार वाटचीं. उसरां दिल्लीं झाडां उदका बगर मरतात अशें मत शेतकारांनी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
