भांगरभूंय | प्रतिनिधी
पणजी: काँग्रेस फुडारी सॅम पित्रोडा हांणी भारतीय लोकांच्या वर्णा वेल्यान वायट उतरां उलयलीं. हाका लागून देशाचो आनी भारतीयांचो अपमान जाला. हे खातीर काँग्रेसीच्या वरिश्ठ फुडाऱ्यां सयत गोंयच्या पदाधिकाऱ्यांनी लोकांची जाहीर माफी मागची अशी मागणी आमदार संकल्प आमोणकार हांणी केली.
बिरेस्तारा पणजेंत घेतिल्ले पत्रकार परिशदेंत ते उलयताले. ह्या वेळार प्रेमानंद म्हांब्रे हाजीर आशिल्ले.
आमोणकार हांणी म्हणलें, विदेशांत रावपी सॅम पित्रोडा हांणी भारतीय लोकांच्या रंगा वेल्यान वायट उतरां उलयलीं. तांकां भारतांत उत्तरेंतले लोक गोरे आनी दक्षीणेंतले लोक आफ्रिकन, अस्तंतेले अरब जाल्यार पुर्वेतले लोक चीनी आशिल्ले भशेन दिसतात अशें उलोवप केल्लें.
ह्या तांच्या उलोवपांतल्यान काँग्रेस फुडाऱ्यांची आनी पक्षाची मानसीकताय समजून येता. पक्षाक लोकसभा वेंचणुकेच्या पयल्या तीन टप्प्यांतली हार दिसून येता, म्हणून ते असलीं विधानां करून मतां मेळोवपाचो यत्न करीत आसात अशें आमोणकार हांणी म्हणलें.
पित्रोडा हांणी समजून घेवंक जाय की भारतांत विविधताय आसली तरी सगले लोक एकठांय आसात. विविधतायेंत आसपी एकवट हीच भारताची वळख. ते ह्या एकवटाचेर घावो घालपाचे काम करीत आसात. काँग्रेसीचे कांय फुडारी विदेशी आसात. आमकां ताचो फरक पडना. आमी स्वाभिमानी भारतीय आसात. हाचे आदींय काँग्रेस फुडाऱ्यांनी घटने आडचीं उलोवपांं केल्लीं. पित्रोडा हांच्या उलोवपाचेर काँग्रेस फुडाऱ्यांनी माफी मागली ना जाल्यार ते लेगीत हाका तेंको दीत आशिल्ल्याचें आमी समजून घेतले अशें संकल्प आमोणकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
