भांगरभूंय | प्रतिनिधी
पणजी ः बेंगळुरूंतल्या आर्टिफिशियल इंटेलिजन्स कंपनीची संस्थापक आनी सीईओ सूचना सेठ हिका बुधवारा बाल न्यायालयान आनीक 14 दीस न्यायालयीन बंदखण दिलां. मजगतीं, सूचनाच्या मानसीक स्थितीची तपासणी करपा संबंदी तिच्या बापायन दाखल केल्ल्या अर्जाचेर पुलिसांनी आपलें म्हणणें सादर करचें असोय निर्देश न्यायालयान दिला.
सूचना सेठ स्वताच्या पुताचो खून करुन ताका बॅगेत भरुन गोंयातल्यान बंगळुराक व्हरतना कळंगुट पुलिसांच्या मजतीन तिका कर्नाटक पुलिसांनी अटक करुन गोंय पुलिसांच्या ताब्यांत दिल्ली. उपरांत म्हपशेंच्या प्रथम वर्ग न्यायालयांत हाजीर केली. त्या वेळार म्हापशें न्यायालयान तिका स दीस बंदखणीची ख्यास्त फर्मायल्ली. ही केस भुरग्याच्या मरणा कडेन संबंदीत आशिल्ल्यान बाल न्यायालयान ह्या प्रकरणांची सुनावणी घेवन आरोपींक 31 जानेवारी मेरेन बंदखणींत दवरपाचे सांगलें. हो रिमांड सोंपतकच बुधवारा तिका बाल न्यायालयांत हाडली आनी थंय तिचो रिमांड आनीक 14 दीस वाडयलो.
मजगतीं, सूचना सेठ मानसीक नदरेन बरी ना असो दावो करून तिच्या बापायन तिची परतून तपासणी करची असो अर्ज न्यायालयांत दाखल केल्लो. सूचनाच्या बापायन केल्ल्या अर्जाचेर पुलिसांक आपलें म्हणणें सादर करपाचे निर्देश न्यायालयान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
