भांगरभूंय | प्रतिनिधी
पणजीः दिवचल तालुक्यांतल्या सुर्ला गांवांतल्या बाधित शेतकारांक, जमनीदारांक, रावपी लोकांक आनी कायदेशीर वारसदारांक लुकसाण भरपायेचे दावे सादर करपा खातीर खाशेलें सुविधा शिबिराचें आयोजन केला. गोंयच्या मुंबय उच्च न्यायालयाच्या गोंय खंडपिठांत दाखल केल्ल्या रिट याचिकेचेर दिल्ल्या आदेशा प्रमाण ही प्रक्रिया चालीक लायतात. हें शिबीर 20 ते 22 मे 2026 मजगतीं सकाळीं 10 ते सांजेच्या 5 वरां मेरेन सुर्ला गांवांतल्या सरकारी उच्च माध्यमीक शाळेंत जातलें.
उपजिल्होधिकारी आनी उपविभागीय दंडाधिकारी दिवचले हांची पात्र लावार्थ्यांक लुकसाण भरपाय मंजूर करपाक आनी वांटपा खातीर कोर्ट कमिशनर म्हणून नेमणूक केल्या. ते प्रमाण मुख्यमंत्री तशेंच खण आनी भूविज्ञान मंत्री हांच्या निर्देशा प्रमाण दावे सादर करपाक आनी तपासपाक सोंपें जावचें म्हणून हें शिबीर आयोजीत केलां.
संबंदीत सगल्या पात्र दावेदारांनी गरजेच्या कागदपत्रां सयत शिबिराक हाजीर रावून दावे सादर करचे असो उलो प्रशासनान केलां. बाधित सर्वे क्रमांक, लावार्थ्यांचीं नांवां आनी हक्काचो तपशीलांची वळेरी सुर्ला ग्राम पंचायत कार्यालयांत उपलब्ध केला.
दावेदारांक फॉर्म-1 आनी 14 ची प्रत, वळखपत्र, बँक खात्याचो तपशील, 100 रुपयांच्या स्टॅम्प कागदाचेर ‘इंडेम्निटी बाँड’, मरण प्रमाणपत्र, वारसदार प्रमाणपत्र, संमती पत्र आनी हेर संबंदीत महसूल कागदपत्रांची प्रत सादर करची पडटली. सगल्या कागदपत्रांच्या प्रती सयत सत्यापना खातीर मूळ कागदपत्रां हाडप सक्तीचें आसा.
वळख, हक्क आनी कागदपत्रांचें सत्यापन पुराय जाले उपरांतच लुकसाण भरपाय दितले अशेंय प्रशासनान स्पश्ट केलां. वादग्रस्त प्रकरणांत सक्षम न्यायालयाच्या आदेशा मेरेन रक्कम आडावंक मेळटा अशेंय प्रशासनान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
