सुर्याच्या पुनरागमनान मुंबयचो आत्मविस्वास वाडुये

भांगरभूंय | प्रतिनिधी

इंडीयन प्रिमीयर लिगेचे (आयपीएल) 20वे मॅचींत मुंबय इंडियन्साची मॅच दिल्ली कॅपिटल्सा आड जातली. मॅच हांगाच्या वानखेडे स्टेडियमाचेर जातली. दोनूय पंगडां मदीं अजून मेरेन 33 मॅची जाल्यात. हातूंतल्यो 18 मॅची मुंबयन आनी 15 मॅची दिल्लीन जिखल्यात. पूण, 2021 सावन दिल्लीन पांचातल्यो तीन मॅची जिखल्यात.

मुंबय इंडियन्साच्या येसांत सुर्यकुमार यादवाची म्हत्वाची भुमिका आसा. 2022 सावन अजून मेरेन सुर्यकुमाराक दुखापतीक लागूण णव मॅची चुकल्यात. तातूंतल्यो तीन मॅच अंदूंच्या हंगामांतल्यो आसा. सुर्यकुमारान ज्यो तीन मॅची खेळूंक ना, तातूंतल्या सात मॅचींनी मुंबय इंडियन्साक हार घेवची पडल्या. दुसरे वटेन सुर्यकुमाराचे उपस्थितींत मुंबय 24तल्या 11 मॅचींनी जैत फावो जालां. 13 मॅचींनी हार घेवची पडल्या. सुर्यकुमार पंगडांत नासता तेन्ना पंगडाच्या जैताची टक्केवारी 22.2 इतकी आसा. पूण, तो पंगडांत आसता तेन्ना ही टक्केवारी वाडून 45.8 इतकी जाता.

मुंबय इंडियन्साच्या टिम डॅव्हिडान टी-20 क्रिकेटींत स्वताक एक फिनिशराच्या रुपांत सिद्ध केला. दिल्ली वतीन खेळपी ट्रिस्टन स्टब्स लेगीत एक बरो फिनीशर आसा. 2024त डॅव्हिडान टी-20 क्रिकेटींत 16-20 ओव्हरींचे मदीं 17 डावांनी सुमार 40चे सरासरीन आनी 212चे स्ट्रायक रेटीन 314 धांवड्यो केल्यात. दुसरे वटे स्टब्सान 11 डावांनी सुमार 35चे सरासरीन आनी 200चे स्ट्रायक रेटीन 208 धांवड्यो केल्यात.

दावखुऱ्या हातान फास्ट बॉलींग करपी बॉलरां आड खेळटना मुंबयचे बॅट्समन मात्शें धडपडटात. हें राजस्थान रॉयल्सा आड लेगीत पळोवपाक मेळिल्लें. 2022 सावन अजून मेरेन दाव्या हातान घालपी फास्ट बॉलरां आड पावरप्लेंत मुंबयच्या बॅट्समनांची सरासरी 22.7 इतली आसा. दिल्लीचो फास्ट बॉलर खलील अहमद सध्या फॉर्मांत आसा आनी तो मुंबयच्या ह्या दुबळ्यापणाचो फायदो घेवपाक इत्सूक आसतलो.

दुखापतीतल्यान पुर्ण बरो जावन येवपी ऋषभ पंत हो फास्ट बॉलर जसप्रीत बुमरा आड गडबडटा. आयपीएलाच्या 13 डावांनी खेळटना बुमरान अजून मेरेन पंताक स खेपे बाद केला. ह्या कालावधीत पंतान 43 बॉलांनी फकत 48 धांवड्यो केल्यात. बुमरा उपरांत मोहम्मद सिराजान पंताक चार खेपे तंबूंत धाडला.