सुर्यकुमार यादव मुखेली

भांगरभूंय | प्रतिनिधी

ऑस्ट्रेलिया पंगडा आड जावपी पांच टी-20 मॅचींचे माळे खातीर भारताच्या पंगडाची घोशणा केली. सुर्यकुमार यादव पंगडाचो मुखेली आसतलो, जाल्यार आदलो बॅट्समन व्ही व्ही एस लक्ष्मण मुखेल प्रशिक्षक आसतलो.

आयर्लेण्डा आड खेळिल्ल्या चडश्या खेळगड्यांचीच निवड जाल्या. आयर्लेण्डा आड फुडारपण करपी जसप्रीत बुमरा आसचो ना. ताका विसव दिला. अश्टतासांचो खेळगडो हार्दिक पांड्या पुर्ण बरो जावंक नाशिल्ल्यान ताच्या नांवाचो विचार जालो ना. हे माळे खातीर अक्षर पटेलाचें पुनरागमन जालां. अक्षर पटेलाची संवसारीक सर्ती खातीर निवड जाल्ली. पूण, अखेरच्या खिणाक जखमी जाल्ल्यान ताचे सुवातेर आर आश्विनाची निवड केल्ली. अणभवी विकेटकीपर बॅट्समन संजू सॅमसनाची निवड जावंक ना. आयर्लेण्डा आडचे माळेंत तो खेळिल्लो. ताचे सुवातेर इशान किशनाची निवड केल्या. युवा विकेटकीपर जितेश शर्मान आपली सुवात राखपाक येस मेळयलां.

पंगडाची काल घोशणा जाली. निवड समितीचे बसकेंत श्रेयस अय्यराचो मुखेली म्हणून विचार मुखार आयिल्लो. पूण, कांय निवड समितीच्या वांगड्यांनी ताचेर आशिल्लें कामाचें वजें उणें करपाक जाय अशें म्हणलें. आयतारा संवसारीक सर्तीचे फायनलींत खेळिल्ल्या पंगडांतल्या तीन खेळगड्यांक सुवात मेळ्ळ्या. जाल्यार रोहित शर्मा, विराट कोहली, जसप्रीत बुमरा आनी रवींद्र जडेजा हांकां विसव दिला. श्रेयस अय्यराक निमाण्या दोन मॅचीं खातीर पंगडाचो उप मुखेली केला. पयल्या तीन मॅचीं खातीर ऋतुराज गायकवाड उप मुखेली आसतलो.

ऑस्ट्रेलिये आडची ही माळ 23 नोव्हेंबरा सावन सुरू जातली. पयली मॅच विशाखापट्टणमांत जातली. निमाणी मॅच 3 डिसेंबराक बंगळुरूंत जातली. दुसरी मॅच 26 नोव्हेंबराक त्रिवेंद्रमांत, तिसरी मॅच 28वेर गुवाहाटींत, जाल्यार चवथी मॅच नागपुरांत 1 डिसेंबराक जातली.

मजगतीं, भारत घरच्या मैदानांचेर फाटल्या 13 टी-20 माळां सावन हारूंक ना. भारतान निमाणी खेपे माळ ऑस्ट्रेलिये आड 2019त वगडायिल्ली. त्या वेळार ऑस्ट्रेलियेन दोन मॅचींची माळ 2-0 अशा फरकान जिखिल्ली.

टी-20 पंगडः सुर्यकुमार यादव (मुखेली), ऋतुराज गायकवाड़ (उप मुखेली), ईशान किशन, यशस्वी जयस्वाल, तिलक वर्मा, रिंकू सिंह, जितेश शर्मा (विकेटकीपर), वॉशिंग्टन सुंदर, अक्षर पटेल, शिवम दुबे, रवि बिश्नोई, अर्शदीप सिंह, प्रसिद्ध कृष्णा, आवेश खान आनी मुकेश कुमार.