भांगरभूंय | प्रतिनिधी
10 मार्चाक पणजे हॉटेल डेलमन हांगा सुवाळो
पणजीः नामनेचे कवी स. नागेश करमली हांणी आपली घरकान्न स. मोहिनी करमली हांच्या नांवान दवरिल्लो 2023चो प्रतिश्ठेचो मोहिनी पुरस्कार नामनेचे व्याकरणकार आनी कोशकार भो. सुरेश बोरकार हांकां फावो जाला अशें भो. रामदास करमली आनी संजना पब्लिकेशन हांणी जाहीर केलां.
ह्या पुरस्काराचें स्वरूप शाल, श्रीफळ, मानपत्र आनी रोख 30,000 रुपया अशें आसा. मार्चाच्या 10 तारखेर, पणजेच्या डेलमन हॉटेलांत सांजेच्या 5 वरांचेर मुखेल सोयरे अॅड. उदय भेंब्रे आनी मानाचे सोयरे भो. प्रभाकर भिडे हांचे हस्तुकी ह्या पुरस्काराची भेटवण जातली.
सांखळेच्या सरकारी उच्च माध्यमीक विद्यालयांतल्यान उपप्राचार्य पदा वयल्यान निवृत्त जाल्ल्या सुरेशबाबान कोंकणी सरस्पतीच्या दालनाक आपल्या मोलाच्या वावरान भोव गिरेस्त केलां. कोंकणी शिकपी भुरग्यां खातीर पयली ते चवथी यत्तांचीं गणिताचीं पुस्तकां तयार करप, शुद्धलेखन जाग्यार घालपाचो वावर, इंग्लीश शिक्षकांक प्रशिक्षण दिवपा खातीर दिवचले स्थापन जाल्ल्या इंग्लीश ट्रेनींग सॅण्टरांत चीफ ट्युटर म्हणून काम, सरकारी कर्मचाऱ्यांक प्रशिक्षण दिवपा खातीरचो अभ्यासक्रम तयार करपाच्या मंडळाचे वांगडी म्हणून वावर, मुळाव्या शिक्षकांक कोंकणीचें प्रशिक्षण दिवपा खातीर प्रशिक्षक तयार करपाचें काम, क्रिस्तांव आवय-बापांयक देवनागरींतल्यान कोंकणीची वळख जावची हे खातीर राजहंस वितरणाच्या प्रभाकरबाब भिडे हांच्या आगऱ्याक लागून ‘लेट्स लर्न कोंकणी’ ह्या पुस्तकाचो वावर, कोंकणी व्याकरण, मुकेशबाब थळी आनी दामोदरबाब घाणेकार हांच्या पालवान ‘कोंकणी-इंग्लीश शब्दकोश’, दामोदरबाब घाणेकार हांच्या पालवान ‘कोंकणी सचित्र अश्टांगी अभ्यासकोश’, ‘कोंकणीचें ध्वनीशास्त्र आनी भाशेच्यो बारीकसाणी’ हाचो वावर असो हो निसुवार्थीपणान केल्लो मोलादीक वावर. ते भायर तांचो ‘वज्रथिकां’ नांवाचो कवितांझेलो प्रकाशीत जाला.
कोंकणीचो वावर हें जल्मब्रीद मानपी सुरेशबाबाच्या ह्या मोहिनी पुरस्कार सुवाळ्याक हाजीर रावन उपकारांत दवरचें अशी विनवणी भो. रामदास करमली आनी संजना पब्लिकेशन्स हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
