भांगरभूंय | प्रतिनिधी
म्हापशें, प्रतिनिधी ः घाटेश्वरनगर, खोर्ले- म्हापश्यां मोहम्मद उस्मान (२२, मूळ उत्तरप्रदेश) हांचेर सुरी हल्लो प्रकरणांतले दुबावीत दत्तराज हिरू कळंगुटकार (रा. खोब्रावाडा कळंगुट) हाची म्हापश्यां अतिरिक्त जिल्हो आनी सत्र (फास्ट ट्रॅक) न्यायालयान सशर्थ जामिनाचेर सुटका केली.
५० हजार रूपया हमी रक्कम आनी तितक्याच रक्कमेचो हमीदार, १० दीस पुलीस स्टेशनांत हजेरी लावप, फिर्यादी आनी साक्षिदारांक धमकावपाचो यत्न करचो न्हय, न्यायालयाचे परवानगे बगर देशांतल्यान भायर वच्चें न्हय, गुन्यांवाचे चवकशेंत सहकार्य करप अश्यो अटी आशिल्लो हो जामीन न्यायाधीश शबनम शेख हांणी दिला.
मुखेल दुबावीत चिराग डांगी हाका अजूनय अटक करूंक ना. ताचो अटकपुर्व जामीन अर्ज न्यायालयांत आडकून आसा. ‘घडणुके दिसा चिराग हाणेंच जखमीक मारबडय करून ताचेर सुर्यान हल्लो केलो. ह्या वेळार आपलो अशील दत्तराज हो दुचाकी पार्क करून गेलो आनी जखमीचेर जेन्ना खोंट मारली तेन्ना तो सकयल कोसळ्ळो. ह्या खटल्यात मुखेल दुबाविताक अटक जावंक नाशिल्ल्यान हो जामीन अर्ज मंजूर करचो’, अशी मागणी अर्जदाराच्या वकिलांनी केली.
दुबाविता वतीन न्यायालयांत अॅड. विनायक पोरोब आनी अॅड. प्रथमेश कोरगांवकार हांणी सरकारी पक्षा वतीन सरकारी अॅड प्रशिला नारूलकार हांणी युक्तीवाद केलो.
ही घडणूक शुक्रार २२ मार्च दिसा रातच्या सुमार १२.३० वरांचेर घडिल्ली. फिर्यादी मोहम्मद हो आपल्या भाड्याच्या घरा भायर राविल्लो. ह्या वेळार दुबावीत चिराग आनी दत्तराज ह्या दोगांयनी जखमीक वायट उतरां दिवन मार बडय केली. उपरांत सुरयेन मोहम्मद हाचेर वार केले आनी ताका थंयच तसोच सोडून पळ्ळे.
ह्या प्रकरणांत म्हापशें पुलिसांनी दुबावीत चिराग डांगी आनी दत्तराज कळंगूटकार हांचे आड भा.दं.सं.च्या ५०४, ३२६, ५०६(२) आनी ३४ कलमा खाला गुन्यांव नोंद केला आनी ह्या गुन्यांवा खाला दुबाविताक अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
