भांगरभूंय | प्रतिनिधी
मडगांव: दक्षीण गोंय जिल्हो रस्तो सुरक्षा समितीचे देखरेख समितीची बसका जाली. सुरावले फाटल्या म्हयन्यांत जाल्ल्या अपघातांत तरणाट्याक मरण आयिल्लें. ते सुवातेर समितीच्या वांगड्यां सयत अधिकाऱ्यांनी जोड पळोवणी केल्ली. ते सुवातेर फुडल्या सप्तकांत गतीरोधक उबारतले अशी म्हायती रस्तो सुरक्षा समितीचे बसके उपरांत दिली.
रस्तो सुरक्षा समितीची बसका दक्षीण गोंय जिल्हो पुलीस मुख्यालयाच्या सभाघरांत जाली. येरादारी पुलीस उपअधिक्षक प्रबोध शिरवयकार, मडगांव येरादारी पुलीस निरिक्षक संजय दळवी, गोवा कॅनाच्यो लॉर्ना फर्नांडीस आनी समितीतले हेर वांगडी हाजीर आशिल्ले.
हे बसके उपरांत लॉर्ना फर्नांडीस हांणी म्हायती दितना सांगलें, अपघातांची संख्या उणी करपा खातीर सर्वोच्च न्यायालयान नेमणूक केल्ले समिती कडल्यान कांय मार्गदर्शक तत्वां जारी केल्यांत. ते प्रमाण फाटले बसके वेळार रस्तो सुरक्षा आराखडो तयार करपाचो आशिल्लो. पूण आतां विधानसभा अधिवेशनाची कामां आशिल्ल्यान अधिकाऱ्यांक फावोसो वेळ दिवंक मेळचो ना. ते खातीर अधिवेशना उपरांत दक्षीण गोंय रस्तो सुरक्षा आराखडो तयार करपाच्या कामाक सुरवात करतले.
कांय कडेन विजेचे खांबे रस्त्या मदीं आशिल्ल्यान येरादारीक आडखळ जातली अशे तरेन उबारल्यात. अपघाताची शक्यताय आशिल्ल्यान ते खांबे रस्त्याचे कुशीक उबारपाची मागणी केल्या. ते प्रमाण येरादारी खात्यान ताच्या स्थलांतरा खातीर निधी उपलब्ध करचो हे खातीर फाटपुरवण करतात.
कुंकळ्ळे, सांवड्डें, काणकोण बस स्टॅण्डाची पळोवणी करून समस्या समजून घैवपाचें थारायलां. अधिवेशना उपरांत पळोवणी करतले. तशेंच मडगांव कदंब बस स्टॅण्ड ते रेल्वे स्टेशन ह्या मार्गार खाजगी बशी सुरू आसात. खाजगी बशी प्रवाशां कडल्यान चड पयशे घेतात आनी बशींनी गर्दी लेगीत आसता. त्या मार्गार कदंब म्हामंडळा कडल्यान बशी सोडच्यो अशी मागणी केल्ली. ताका मान्यताय मेळ्ळ्या. नव्यो बशी आयले उपरांत त्या मार्गार बशी सोडटले अशी म्हायती फर्नांडीस हांणी दिली.
गतीरोधकां खातीर निधीचो उणाव
निधीचो उणाव आशिल्ल्या कारणान ज्या रस्त्यांचेर गतीरोधक उबारपाक हाचे पयलीं पळोवणी केले उपरांत मंजुरी मेळ्ळ्या, तीं कामांय अजून पुराय जाल्लीं नात. तीं कामां सद्या स्थगीत दवरल्यांत. ताचेरूय उपाय येवजण करून निधीची उबारणी कशी करची हाचेर चर्चा केली अशी म्हायती लॉर्ना फर्नांडीस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
