भांगरभूंय | प्रतिनिधी
पणजी, बातमीदार ः भारताच्या वेंचणूक आयोगान लोकसभा वेंचणुकेचें वेळापत्रक जाहीर केल्ल्यान 16 मार्च 2024 सावन देशभरांत आदर्श आचारसंहिता लागू जाल्या. हे फाटभुंयेर वेंचणुकेची प्रक्रिया पुराय जायसर उत्तर आनी दक्षिण गोंयांत सुरक्षा दळ सोडून हेर कोणेंय शस्त्रां घेवन भोंवपाचेर, बाळगुपाचेर बंदी घाल्या. उत्तर गोंयची जिल्लोधिकारी डॉ. स्नेहा गीते आनी दक्षिण गोंयचे जिल्लोधिकारी अश्विन चंद्रू हांणी हो आदेश जारी केला.
लोकसभा वेंचणुकेचे फांटभूंयेर फौजदारी प्रक्रिया संहिता, 1973 च्या कलम 144 च्या पोटकलम (1) खाला सगळ्या प्रकारचीं शस्त्रां आनी अग्निशस्त्रां आनी घातक शस्त्रां बरोबर घेवन भोंवपाचेर पुराय बंदी आसतली अशें दोनूय जिल्लोधिकाऱ्यांनी आदेशांत स्पश्ट केलां.
उत्तर आनी दक्षिण गोंय जिल्हो अधिकारक्षेत्रांत मुक्त, निष्पक्ष, शांततायेन आनी वेवस्थीत वेंचणुकेची प्रक्रिया करप गरजेचें आसा. हे फाटभुंयेर कसलोच अनुचित प्रकार घडचो न्हय म्हूण खबरदारी म्हणून शस्त्रां बाळगूपाचेर बंदी घाल्या. पूण भौशीक सुवातेर सेवा दिवपी पुलीस, संरक्षण कर्मचारी आनी सरकारी सेवा कर्मचाऱ्यांक, खेळां कर्मचाऱ्यांक तो लागू जावचो ना. तशेंच नॅशनल रायफल असोसिएशन ऑफ इंडियाचे वांगडी, बँकांचे सुरक्षे खातीर जापसालदार अधिकारी आनी तांच्या सुरक्षा रक्षकां खातीर वा कायद्यान विशिश्ट कारणाक लागून सुट दिल्ल्यांक कसलेंच बंधन ना अशेंय ह्या आदेशांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
