भांगरभूंय | प्रतिनिधी
पणजी ः सेंट फ्रान्सीस झेवियर हांचे कुडी विशीं आक्षेपार्ह विधान केल्ल्या प्रकरणांत आयज जाल्ले सुनावणेंत उच्च न्यायालयान दिल्ल्या आदेशा उपरांत निमाणे सुभाष वेलिंगकार दिवचल पुलीस स्टेशनांत हजर जाले. पुलिसांनी धाडिल्ले नोटिशींचें पालन करुन आयज सांजवेळा मेरेन पुलीस स्टेशनाचेर हजर रावपाचो आदेश वेलींगकार हांकां दिल्लो.
सेंट फ्रान्सीस झेवियर हांचे कुडी विशीं आक्षेपार्ह विधान केल्ल्या प्रकरणांत सत्र न्यायालयान अटकपूर्व जामीन न्हयकारले उपरांत हिंदू रक्षा महाआघाडीचे राज्य निमंत्रक सुभाष वेलींगकार हांणी उच्च न्यायालयांत अर्ज दाखल केल्लो. ताचेर आयज सुनावणी जाली. मजगतीं, दिवचल पुलिसांनी धाडिल्ले तिसरे नोटिशींचे पालन करुन वेलींगकार चवकशेक हजर रावपाक तयार आसा, पूण तांका अटक जावची ना हाची हमी पुलिसांनी दिवची असो युक्तिवाद ज्येश्ठ वकील अॅड. सरेश लोटलीकार हांणी वेलींगकार हांचे वतीन केलो.
मजगतीं, उच्च न्यायालयान दिवचल पुलिसांनी धाडिल्ले नोटिशींचें पालन करुन आयज सांजवेळा मेरेन पुलीस स्टेशनाचेर हजर रावपाचो आदेश वेलींगकार हांकां दिल्लो. ह्या प्रकरणांतली फुडली सुनावणी मंगळारा जातली. वेलींगकार हांणी दाखल केल्ल्या अटकपूर्व जामिनाक विरोध करून 4 जाणांनी हस्तक्षेप याचिका दाखल केल्ली.
आयज दिवचल पुलिसांनी तांका चवकशे खातीर हजर रावपाक तिसरी नोटीस धाडिल्ली. तिसरे नोटिशींचे पालन करुन आनी उच्च न्यायालयान आयज दिल्ल्या आदेशाचे पालन करुन वेलींगकार आयज सांजवेळार दिवचल पुलीस स्टेशनांत हजर जालें. तें पुलीस स्टेशनांच्या फाटल्या दारांतल्यान भितर आयिल्ल्याचे कळटां. पुलीस स्टेशनाच्या वाठारांत व्हडलो पुलीस बंदोबस्त आसा. तशेंच हिंदुत्वनिश्ठ संघटनेचे वांगडीय जमल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
