भांगरभूंय | प्रतिनिधी
-मालती राव हांच्या कादंबरीच्या अणकारा खातीर पुरस्कार
पणजी: मालती राव हांच्या डिजॉर्डली वूमेन ह्या कादंबरीच्या कोंकणी अणकारा खातीर सुनेत्रा जोग हांकां साहित्य अकादेमीचो पुरस्कार फावो जाला. अस्ताव्यस्त बायलो ह्या पुस्तका खातीर तांकां हो पुरस्कार मेळ्ळो.
साहित्य अकादेमीन अणकारा खातीर 2023 वर्साच्या पुरस्काराची घोशणा केली. रोख 50 हजार रुपया आनी कांश्याचें पदक अशें ह्या पुरस्काराचे स्वरूप आसा. खासा सुवाळ्यांत पुरस्कारांचें वाटप जातलें, अशें साहित्य अकादेमीन स्पश्ट केलां. मराठी खातीर अभय सदवर्ते हांच्या ब्राह्मोस : एका अज्ञात समशोधन यात्रेची यशोगाथा ह्या पुस्तका खातीर पुरस्कार फावो जालां.
अस्ताव्यस्त बायलो ही कांणी चार ब्राह्मण बायलांची आसा. वेंकू बाय, रूक्मिणी, कमला हांणी समाजाच्यो रुढी तोडपाचे यत्न केले. हाचेर आदारीत ही कादंंबरी आसा. साहित्याच्या अणकारा खातीर भाशेचें गिन्यान, मोग आनी समर्पीत जावपाची तांक आसची पडटा, अशें मत सुनेत्रा जोग हांणी उक्तायलां.
2012 सावन सुनेत्रा जोग ह्यो अणकाराच्या क्षेत्रांत आसात. सुधा मुर्ती हांच्या पुस्तकाच्या अणकाराक लागून त्यो उजवाडांत आयल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
