भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज पयली मॅच येजमान कोलकाता नायट रायडर्स आनी रॉयल चॅलेंजर्स बंगळुरू ह्या पंगडां मदीं हांगाच्या इडन गार्डन्स मैदानाचेर जातली. ह्या मैदानाचेर दोनूय पंगडां मदीं वट्ट 11 मॅची जाल्यात. हातूंतल्यो सात मॅची येजमान कोलकातान जिखल्यात.
बंगळुरूच्या फास्ट बॉलर रीस टॉपले आड फिल सॉल्टाचो रॅकॉर्ड बरो ना. सॉल्टान अजून मेरेन टॉपले आड 16 बॉलांनी फकत 17 धांवड्यो केल्यात आनी तीन खेपे बाद जाला. अंदूंच्या हंगामांत सॉल्टान कोलकाता वतीन बरें प्रदर्शन केलां. ताका लागून जर टॉपले आयज सॉल्टाक बेगीन बाद करता जाल्यार ही बंगळुरू खातीर फायद्याची गजाल थारतली.
राजस्थान रॉयल्सा आड शेंकड्याची खेळी केल्या उपरांत सुनील नरेनाचो आत्मविस्वास बरोच वाडला. तशेंच बंगळुरू आड एक ओपनराच्या रुपान सात डावांनी सुनील नरेनाची स्ट्रायक रेट 203ची आसा. ताणें ह्या काळांत 16 सके लेगीत मारल्यात. जाल्यार आंद्रे रसेलाक बंगळुरू आड खेळपाक खूब आवडटा. ताणें बंगळुरू आड 36चे सरासरीन 205चे स्ट्रायक रेटीन धांवड्यो केल्यात. हातूंत 38 सक्यांचो आस्पाव आसा. तशेंच रसेलान फाफ ड्युप्लेसीस आनी विराक कोहलीक दरेकी तीन खेपे बाद केला.
अंदूंच्या हंगामांत फकत एके ओव्हरींत स्टार्कान पांच खेपे 15 परस चड धांवड्यो दिल्यात. तशेंच पांच डावांनी डॅथ ओव्हरींनी ताची इकॉनोमी रेट 13.28 इतकी आसा. स्टार्का खेरीत कोलकाताचे चडशे फास्ट बॉलर युवा आसात. ताका लागून डॅथ ओव्हरींनी स्टार्काक आनीक चड सादूर रावन बॉलींग करची पडटली.
वरुण चक्रवर्ती आनी सुनील नरेन हांच्या आड ड्युप्लेसीस तीन खेपे, कोहली पांच खेपे आनी दिनेश कार्तिक दोन खेपे बाद जाला. पूण, कोहली सध्या वेगळ्याच फॉर्मांत आसा. फाटल्या हंगामा कडेन तुळा केली जाल्यार हे खेपे कोहली चड वेगान धांवड्यो करता. अंदूंच्या हंगामांतली ताची स्ट्रायक रेट 146ची आसा आनी सरासरी 83ची आसा. ताका लागून तो एका हातान लेगीत आपल्या पंगडाक जैत मेळोवन दिवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
