भांगरभूंय | प्रतिनिधी
पणजी ः अंदूंच्या स्वाभिमान पुलीस पुरस्कारांत अधीक्षक सुनीता सावंत हांकां लोकमान्य पुलीस जाल्यार अधीक्षक हरीश मडकयकार आनी उपअधीक्षक सिद्धांत शिरोडकार हांकां समाज मित्र पुलीस पुरस्कार दिवन तांचो भोवमान करतले. कला आनी संस्कृती मंत्री गोविंद गावडे हांणी बिरेस्तारा पणजे जाल्लें पत्रकार परिशदेंत ही म्हायती दिली. ह्या वेळार परेश नायक आनी संदीप निगळ्ये हाजीर आशिल्ले.
ही कार्यावळ शेनवारा, 9 नोव्हेंबराक कला अकादेमींत सांजवेळा 5 वरांचेर सुरू जातली. मुख्यमंत्री डॉ. प्रमोद सावंत मुखेल सोयरे म्हूण हाजीर आसतले. पर्यटन मंत्री रोहन खंवटे, एलआयसीचे आदले अध्यक्ष कमल कुमार, पुलीस महासंचालक आलोक कुमार हेय हाजीर आसतले. कार्यावळींत पुलीस, होमगार्ड, सरकारी वकील आनी उजो पालोवपी दळाच्या जवानांचोय भोवमान जातलो, अशें गावडे हांणी सांगलें.
ह्या सुवाळ्यांत उत्कृश्ट पुलीस अधीक्षक म्हूण नेल्सन अल्बुकर्क, उत्कृश्ट उपअधीक्षक विल्सन डिसोझा, गुरुदास कदम, सागर एकोस्कार, नीलेश राणे आनी शिवराम वायंगणकार हांचो भोवमान जातलो. तशेंच उत्कृश्ट पुलीस निरीक्षक म्हूण परेश नायक, संजय दळवी, मेल्सन कुलासो आनी रीमा नायक हांची निवड केल्या. प्रशासन खात्यांतलो हेडक्लार्क महेश नायक, पीएसआय सपना गांवस, साहिल वारंग, शिवराम गांवस, विजय देसाय आनी आशीष परब हांचीय निवड जाल्या.
हाचे भायर उत्कृश्ट सहाय्यक पुलीस उपनिरीक्षक म्हूण कृष्ण गोसावी, जितेंद्र गांवकार, गोकुळदास मोखर्डेकर आनी प्रचिता फळदेसाय हांची निवड जाल्या. सरकारी वकील विभागात सुषमा नायक मांद्रेकार आनी व्हीजीटाकाऊ कोस्टा, उजो पालोवपी दळांत गितेश नायक आनी परेश मांद्रेकार, होम गार्ड म्हूण अखिल गांवस आनी विजया मातोंडकार हांची निवड जाल्या, अशें गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
