भांगरभूंय | प्रतिनिधी
म्हापशें : मनशा वरीं जनावरांक उलोवपाक कळना. जायते फावट मनीस अश्या मोन्या जनावरांक त्रास दितना पळोवपाक मेळटा. हालींच मुखार आयिल्ले म्हायती प्रमाण, अशोक पन्हाळकार (सध्या खोर्ली म्हापशें रावता, मुळचो कर्नाटकाचो) हांणी ४ सप्टेंबराक सांजे वेळार सुमार ४:१५ वरांचेर एका रस्ताद सुण्याक आपले दुचाकीक बांदून झरकटत ओडीत व्हेलो. रस्त्याचेर झरकटत गेल्ल्यान तो सुणो गंभीर जखमी जालो आनी उपरांत ताका मरण आयलें. उपरांत मरण आयिल्ल्या त्या सुण्याची कूड अशोक पन्हाळकार हांणी थंयच कुशीक उडयली.
हे घडणुकेचो व्हिडिओ सोशल मिडियाचेर व्हायरल जाले उपरांत, एका मनशान पन्हाळकार हाचे आड एफआयआर दाखल केली. ह्याच आदाराचेर पुलिसांनी बिरेस्तारा आरोपी आड जनावरां क्रुरताय प्रतिबंधक कायद्या खाला गुन्यांव दाखल केलो आनी अटक केली.
मजगतीं, अशीच आनीक एक घडणूक मुखार आयल्या. गोंयांतूच फाटल्या कांय दिसां आदीं एका रस्ताद सुण्याक कोणें तरी सोरो पियेवन असोच रस्त्याचेर सोडिल्लो. तें मुकें जनावर सोर्याचे नशेन रस्त्याचेर हालत धोलत चलतनाचो व्हिडियो व्हायरल जाल्लो. स्वताचे मजे खातीर मोनजातीचे जिणे कडेन कित्याक खेळटात? अशे म्हणत त्या व्हिडियोच्या कमेंट बॉक्सांत जायत्या जाणांनी खर टिका केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
