भांगरभूंय | प्रतिनिधी
कोलवाळ पुलिशेंत दुबाविता आड गुन्यांव
म्हापशें: रस्ताद सुण्यांक खाण दिवपा खातीर वचपी बायलेचो फाटलाग करून आनी तिचो खाण दितनाचो मोबायलाचेर व्हिडिओ काडून सोशल मिडियाचेर व्हायरल करपाचो प्रकार घडलो. ह्या प्रकरणांत कोलवाळ पुलिसांनी दुबावीत आरोपी रितेश शेट्ये (हावसींग बोर्ड, कोलवाळ) हाचे आड गुन्यांव नोंद केला.
हो प्रकार फाटल्या 8 मार्च दिसा रातच्या 10.30 वरांच्या सुमाराक घडिल्लो. कागाळदार मिनाक्षी नायक (कोलवाळ) हांणी ह्या प्रकरणांत पुलिशेंत कागाळ दाखल केल्या. कोलवाळ हांगासरल्या मिनी सेटलायट टावनशीप घर निर्माण वसणूक वाठारांत निर्जन थळार आशिल्ल्या रस्ताद सुण्यांक आपले स्कुटरी वेल्यान वचून खाण दिवपा खातीर वचपी कागाळदार बायलेचो दुबावितान फाटलाग केल्लो.
उपरांत दुबावितान कागाळदार बायल रस्त्याचे कुशीक आशिल्ल्या सुण्यांक खाण दिता आसतना मोबायलाचेर तिचो व्हिडिओ काडलो, आनी उपरांत तो दुबावितान सोशल मिडियाचेर व्हायरल करून कागाळदार बायलेची मानहानी केली.
हो प्रकार समजले उपरांत कागाळदार बायलेन कोलवाळ पुलिशेंत 3 एप्रील दिसा कागाळ दाखल केली. ते प्रमाण पुलिसांनी दुबाविता आड भादंसंच्या 354 ड कलमा खाला गुन्यांव नोंद केला. फुडलो तपास पुलीस निरिक्षक विजय राणे हांच्या मार्गदर्शना खाला हवालदार अनील शेट्ये करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
