भांगरभूंय | प्रतिनिधी
संघटनेचे अध्यक्ष डॉ. शिवाजी शेट हांची मागणी
पणजीः सध्या सरकार सुटके झुजार्यांच्या भुरग्यांक ‘क’ आनी ‘ड’ श्रेणींतल्यो नोकर्यो दिता. विधानसभेंत पास केल्ले येवजणे प्रमाण हातूंत ‘अ’ आनी ‘ब’ वर्गांतल्या राजपत्रीत (गॅझेटेड) अधिकार्यांचीय थारावीक संख्येन भरती जातली. पूण सरकार वा गोंय लोक सेवा आयोग (जीपीएससी) हे संबंदी कसलीच म्हायती दिना. हीं पदां केन्ना भरतले हाची स्पश्ट म्हायती सरकारान दिवची अशी मागणी सुटके झुजार्यांच्या भुरग्यांचे संघटनेचे अध्यक्ष डॉ. शिवाजी शेट हांणी केल्या. आयज पणजे आयोजीत केल्ले पत्रकार परिशदेंत ते उलयताले.
सुटके झुजार्यांच्या भुरग्यां सरकारी नोकर्यो मेळच्यो म्हणून आमी बरोच काळ जायतीं आंदोलनां केलीं. ह्या आंदोलनांची दखल घेवन सरकारान ही येवजण सुरू केल्या आनी भरती प्रक्रियाय चालीक लायल्या, ताचे खातीर आमी मुख्यमंत्री डॉ.प्रमोद सावंत हांचे उपकार मानतात. पूण वांगडा सुटके झुजार्यांच्या भुरग्यांक ‘अ’ आनी ‘ब’ वर्गांतल्या अधिकार्यांचीं कितलीं पदां मेळटलीं आनी ही भरती केन्ना जातली हाची अधिकृत म्हायती मुखार येवप खूब गरजेचें. म्हजो बापूय सुटके झुजारी आशिल्लो. जीपीएससीन चार फावटीं प्राध्यापक पदाची जायरात केल्ली. हांवें दर खेपे ह्या पदाक अर्ज केल्लो; पूण ताचे उपरांत त्या अर्जांचें कितें जालें हाचे विशीं म्हाका कांयच सांगूंक नाशिल्लें, अशें तांणी सांगलें.
’जीपीएससी’च्या ह्या दुबावीत कामा विशीं आमी ह्यान पयलींय मुख्यमंत्री आनी राज्यपालांक पत्रां बरयल्यांत. मात आमकां दोगांय कडल्यान कसलेच तरेचो प्रतिसाद मेळूंक ना. सर्गेस्त मनोहर पर्रीकर मुख्यमंत्री आसतना तांणी सुटके झुजार्यांच्या भुरग्यांची नोकरभरती प्रलंबीत दवरिल्ली. ह्या दीर्घ काळाञत भरती जावंक नाशिल्ल्यान खुबश्या उमेदवारांची पिराय ५९ ते ६० वर्सां पुराय जाल्यांत. पर्यायान, पिरायेची मर्यादा हुपिल्ल्यान हांका येवजणेचो कसलोच फायदो जावंक ना. मुख्यमंत्री डॉ. प्रमोद सावंत हांणी अशे तरेच्या बादीत लोकांक योग्य अशी अर्थीक भरपाय दिवची, अशी मागणी डॉ. शेट हांणी संघटने वतीन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
