सुटके झुजारी आनी साहित्यीक नागेश करमली संवसाराक अंतरले

भांगरभूंय | प्रतिनिधी

पणजी : गोंयच्या मुक्ती लढ्यातले झुजारी आनी साहित्यीक नागेश करमली हे बिरेस्तारा दनपारां संवसाराक अंतरले. तांचे कुडीचेर आयज सकाळीं 10 वरांचेर सांत इनेज मसंडभुयेंत निमाणे संस्कार जातले. मुख्यमंत्री डॉ. प्रमोद सावंत, विरोधी पक्ष फुडारी युरी आलेमांव हांचे सयत साहित्यीक, कोंकणी संस्थां तशेंच साहित्यिकांनी दुख्ख उक्तायलां.

कोंकणी चळवळ तशेंच गोंयच्या मुक्ती लढ्यांत नागेशबाबाचें व्हड योगदान आशिल्लें. तरणाटे तशेंच कार्यकर्त्यांक ते सेगीत मार्गदर्शन करताले. नागेशबाब करमली हांची पिराय 90 वर्सांची आशिल्ली. खण कंपनींत पर्यवेक्षक म्हूण तांणी काय तेप नोकरी केली. गोंयच्या मुक्ती लढ्यांत तांचो मोटो वांटो आशिल्लो. पणजी आकाशवाणीचेर निवेदक म्हूण तांणी नोकरी केली. जोरगत, सांवार, वंशकुळाचे देणे हे तांचे कवितांझेले लोकप्रीय जाले. वंशकुळाचे देणे हे तांच्या कवितांझेल्याक 1992 वर्सा साहित्य अकादेमीचो पुरस्कार फावो जालो. ते भायर 2007 वर्सा तांकां राज्य पुरस्कार फावो जालो. कोंकणी तशेंच मराठी दिसाळ्यांनी तांणी सातत्यान लेखन केलां.

गोवा फॉरवर्डाचे अध्यक्ष तशेंच आमदार विजय सरदेसाय हांणी तांचे कुडीचें दर्शन घेवन आर्गां ओंपलीं.

नागेशबाबाचें योगदान यादींत उरतलें : मुख्यमंत्री

नागेशबाब अंतरले हे आयकून म्हाका दुख‍ख जालें. गोंय मुक्ती लढ्यांतले तांचे योगदान सदांच यादींत उरतलें. तांच्या आत्म्याक शांतिकाय लाभची, अशें मुख्यमंत्री डॉ. प्रमोद सावंत हांणी म्हणलें.

दुख्खांत हांव वांटेकार : युरी आलेमांव

म्हालगडे, सुटके झुजारी आनी कोंकणी लेखक नागेश करमली हांकां मरण येवप ही दुख्ख दिवपी गजाल आसा. हांव तांचे घरचे तशेंच बरे मागप्यांच्या दुख्खांत वांटेकार आसा.

एक फायटर आनी रायटर गेलो : अरूण साखरदांडे

नागेशबाब कोंकणीचे खडेगांठ फुडारी आशिल्ले. गोंयचें सुटके झूज तशेच कोंकणी चळवळींत तांणी व्हड योगदान दिलां. तांच्या मरणान फायटर आनी रायटर संवसाराक अंतरला, अशें कोंकणी अकादेमीचे अध्यक्ष प्रो. अरूण साखरदांडे हांणी म्हणलें.

कोंकणी नाटकाच्या प्रसारांत वांटो : पुंडलीक नायक

नागेशबाब हो कवी तशेंच संघटक आशिल्लो. लळीतक हे संस्थे वरवीं कोंकणी नाटक गांवांनी पावोवपाचो वावर तांणी केलो. तांकां म्हजी आर्गां.

साहित्य तशेंच कोंकणी चळवळींत योगदान : दामोदर मावजो

नागेश करमली हांणी साहित्य तशेंच कोंकणी चळवळींत मोटे योगदान दिलां. पुंडलीक नायक, एन. शिवदास, जयंती नायक हांचे सयत तांणी कोंकणी नाटक गांवांनी पावोवपाचो वावर केला. तांच्या मरणान समाजाचें लुकसाण जालां अशें साहित्यीक दामोदर मावजो हांणी म्हणलें.

सुटके झुजांतले कार्य यादींत उरतलें : अॅड. रमाकांत खलप

नागेश करमली हे राष्ट्रवादी विचारांचे आशिल्ले. पुराय जिवितांत ते कार्यकर्ते म्हूण वावुरले. गोंयचे सुटके झूज तशेंच राजभास चळवळींतल्या कार्या खातीर ते यादींत उरतले. तांकां आर्गां, अशें आदले केंद्रीय मंत्री अॅड. रमाकांत खलप हांणी म्हणलें.

मार्गदर्शक गेलो : प्रो. सुभाष वेलींगकार

नागेशबाब करमली म्हणल्यार उमेदीचो घसघसो. गोंयच्या राष्ट्रवादाचो एक खांबो हुमकळून पडला. आवयभाशेच्या रक्षणा खातीर भारतीय भाशा सुरक्षा मंचाच्या आंदोलनांतलो तो सेनापती आशिल्लो. आमचो मार्गदर्शक संवसाराक अंतरलो, अशें प्रो. सुभाष वेलींगकार हांणी म्हणलें.

कोंकणी साहित्यांतलें करमलींचें योगदान मोलाचें

ज्येश्ठ स्वातंत्र्यसैनीक आनी नामनेचे कोंकणी साहित्यीक नागेश करमली हांच्या मरणान गोंयचें व्हड लुकसाण जालां. पणजी आकाशवाणी केंद्राचेर तांचो सांगात म्हाका लाबला. तशेंच आयएमबीन आयोजीत केल्ल्या कितल्याश्याच गोंयच्या कवींच्या काव्य संमेलनांनी ते मुजरत हाजेरी लायताले. गोंय मुक्ती खातीर एक प्रखर स्वातंत्र्यसैनीक म्हणून तांणी दिल्लो लढो प्रेरणा दिवपी असो आसलो. मुक्ती उपरांत गोंयच्या स्वातंत्र्य सैनिकांचे कितलेशेच प्रस्न तांणी सुटावे केले. कोंकणी साहित्यांत तांणी जें योगदान दिलां तें दरेका साहित्यकाराक दिशा दाखोवपी आसा. देव तांच्या आत्म्यांक शांती दिवूं अश्या उतरांनी इन्स्टिट्यूट मिनेझीस ब्रागांझाचे अध्यक्ष दशरथ परब हांणी नागेश करमली हांकां आर्गां ओंपल्यांत.