भांगरभूंय | प्रतिनिधी
फोंडें, प्रतिनिधी: सुकतळी-मोल्यां बुधवारा रातच्या सुमार २.२० वरांचेर वेर्णा वचपी माल येरादारी करपी ट्रकाचो झाडाक धपको बसून शंकर अलिगर (३१, कर्नाटक) हो चालक गंभीर जखमी जालो. अपघाता उपरांत कॅबिनांत आडकून पडिल्ल्या चालकाक फोंडें उजो पालोवपी दळान भायर काडलो. जखमीचेर सध्या गोमॅकोंत उपचार सुरु आसा. कुळें पोलिसांनी अपघाताचो पंचनामो केलो.
पुलिसांनी दिल्ले म्हायती प्रमाण, रातीं उसरां कर्नाटकांतल्यान आयिल्ल्या आनी वेर्णा वचपी ट्रकान रस्त्या कुशीक आशिल्ल्या झाडाक धपको दिलो. ट्रक ड्रायव्हर कॅबिनांत आडकून उरलो. फोंडें उजो पालोवपी दळाच्या कर्मचार्यांक म्हायती दिल्या उपरांत तांणी घडणुके सुवातेर वचून आडकून उरिल्ल्यान चालकाक कॅबिनांतल्यान भायर काडलो. ताका पयलीं पिळये भलायकी केंद्रांत दाखल केलें. उपरांत चड उपचारा खातीर ताका गोमॅकोंत धाडलो. फोंडें उजो पालोवपी दळाचे कर्मचारी नरेश गावडे, गणेश गावडे, गौरेश फडते, बशीर मुजावर आनी अरुण गोटमुखकार हांणी कॅबिनांत आडकल्ल्या चालकाक भायर काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
